DILI, 03 abríl 2021 (TATOLI)- Komandu Polísia Nasional Timor-Leste (PNTL) Munisípiu Dili, ekipa Polísia Forensik ho ekipa médiku Ospitál Nasionál Guido Valadares (HNGV) finaliza ona levantamentu no investigasaun ba kauza hosi matebian Filomena Fatima, ne’ebé tara-an iha nia uma-laran iha Aldeia Masin Lidun, Lagoa Tasi-Tolu, Suku Comoro, Postu Administrativu Don Aleixo, Munisípiu Dili, kinta kalan (31/03).
Notísia Relevante : Polísia seidauk fó-sai rezultadu investigasaun kazu Filomena tara-an
Hosi levantamentu no investigasaun hosi autoridade parte tolu ne’e hatudu katak matebian deside tara-an tanba presaun psikolójika ho kondisaun moris ne’ebé susar tebetebes no laiha ona hahán atu bele sustenta nia-an ho nia oan-feto ida.
“Polísia nota iha terrenu laiha buat ruma mak rai iha uma-laran atu matebian ho nia oan-feto bele konsumu, no informasaun ne’ebé polísia rekolla la halo estrañu, maibé realidade ida,” Segundu Komandante PNTL Munisípiu Dili, Superintendente, Euclides Belo hateten ba jornalista sira liuhosi konferénsia imprensa, sábadu ne’e, iha Komandu PNTL Munisípiu Dili.
Superintendente Euclides Belo hateten, konferénsia imprensa ne’e PNTL Munisípiu Dili realiza hodi informa ba públiku no konfirma mós ba públiku katak notísia sira ne’ebé mídia nasionál publika kona-ba matebian Filomena Fatima tara-an tanba hanoin barak no hahán laiha, la’ós hoax, maibé realidade ida.
Notísia Relevante : Loron-rua molok tara-an, Filomena husu foos ba viziñu
Euclides Belo relata katak rezultadu investigasaun polísia forensik no ekipa médiku prova iha fatin akontesimentu, vítima tara-an uza fiu hodi kesi metin ba nia kakorok hodi tara-an iha uma-laran rabat ba odamatan kotuk ho kondisaun hamriik.
Iha prosesu investigasaun no levantamentu dadus ne’ebé ekipa rekolla hatudu mós katak, vítima mate la’ós tanba problema kazu krime ka violénsia ruma, maibé problema psikolojia ne’ebé afeta ba matebian, tanba laiha hahán hodi bele sustenta nia vida ho nia oan feto-ida.
“Prosesu investigasaun halo hotu hodi entrega fali mate-isin ba família sira, signifika katak, vítima mate tara-an ne’e la’ós tanba ema ruma maka oho, maibé vítima ho konsiénsia tara-an rasik, tanba problema kondisaun sosiál sira ne’ebé nia enfrenta, laiha hahán no ami haree iha fatór sira ne’e maka bele kontribui ba nia tara-an,” Segundu Komandante PNTL, Euclides Belo hateten.
Hosi dadus ne’ebé polísia no ekipa médiku HNGV rekolla, Superintendente Euclides Belo konsidera sufisiente ona, tanba ne’e ekipa investigasaun deside labele lori matebian ba halo autópsia iha HNGV.
“Ita haree iha mós fatór balun bele kontribui ba nia mate, hanesan (“phobia” ka trauma psikolojia oin-oin) ne’ebé lakon tiha nia sentimentu hodi halo buat ruma dentru ho situasaun ne’ebé ita hasoru, tanba depresaun boot no laiha duni lojístika ka hahán tanba Polísia mós rekolla faktu no prova iha matebian nia uma-laran, la iha duni buat ida no laiha hahán atu sustenta nia nesesidade bázika loron-loron nian,” Euclides afirma tan.
Vítima Filomena Fatima, hosi Aldeia Fatuboro, Suku Riheu, Munisipiu Ermera oan hosi aman, Abrão de Deus no inan Sara Maia.
Vítima nia lain Rosario Manuel no iha oan na’in haat (4), kompostu hosi oan mane na’in-tolu no feto ida. Mane na’in tolu hela ho sira nia aman iha Ermera no matebian hela ho feto oan ida iha sira-nia uma ne’ebé matebian tara-aan ba.
Jornalista sira, sábadu ne’e, fila-fali ba mate-uma iha Masin Lidun, Lagoa Tasi-Tolu, Dili, hodi konfirma tan dala-ida ho Joanita Leite nu’udar viziñu ne’ebé hela besik matebian hodi fó sasin tan katak iha loron-rua molok matebian tara aan, nia ba husu duni foos lata rua hodi uza ba te’in.
“Loron-rua molok nia tara-aan, nia ba husu duni foos lata-rua ba ha’u no ha’u fó duni foos ba nia,” Joanita Leite haktuir hodi responde jornalista sira.
Joanita Leite hateten haree hosi espresaun matebian nia oin bainhira husu foos ba nia hatudu oin moe-moe, maibé tanba moris viziñu sempre fó apoiu tuir kbiit ne’ebé iha.
Matebian mós deklara, hafoin empresta foos situasaun normal hein nia kaben fila hosi Ermera hodi entrega fali foos ne’ebé empresta, maibé viziñu ne’e ho laran di’ak hatán dehan, lalika.
Matebian nia katuas-oan, Rosario Manuel, haktuir nia sentimentu triste ba jornalista sira no nia rekoñese katak nia kaben mate, tanba problema hahán laiha.
“Loos duni tanba Estadu Emerjénsia, ha’u ba tiha Ermera no atu fila mai ita implementa ona serka sanitária no konfinamentu domisiliáriu, atu mai mós labele, tanba ne’e ha’u nia ferik-oan hanoin barak, hahán laiha no tara-aan,” Rosario Manuel hateten.
Família sira deside ona atu halot deit mate-sin iha semitériu Masin Lidun, Tasi-Tolu, Dili no la lori ba iha Ermera tanba situasaun serka sanitaria no konfinamentu domisiliáriu.
Jornalista : Eugénio Pereira
Editór : Francisco Simões
