DILI, 05 abríl 2021 (TATOLI)—Primeiru-Ministru (PM), Taur Matan Ruak, lidera reuniaun komisaun interministeriál ba protesaun sivíl no dezastre naturál hodi halo koordenasaun no hatán ba impaktu inundasaun ne’ebé akontese iha domingu (04/04) tuku 02:00 madrugada iha kuaze iha munisípiu hotu inkliu kapitál Dili ho intensidadee boot.
Pontu prinsipál iha diskusaun maka atu haree situasaun no halo analiza ba medida nesesáriu rekuperasaun no estragu hirak ne’ebé maka provoka inundasaun no afeta ba populasaun sira.
Iha reuniaun ne’e, deside ona katak iha ajuda umanitária sei konsentra hotu liuhosi Sekretária Estadu Protesaun Sivíl (SEPS).
“Apela ba sidadaun no organizasaun sira hotu, ne’ebé mak iha kbiit atu fó apoiu ba família sira ne’ebé mak lakon hela fatin ou presiza apoiu emerjénsia, bele hakbesik-an ba Sekretária Estadu Protesaun Sivíl hodi nune’e sira bele kanaliza ba hirak ne’ebé presiza iha momentu ida ne’e,” Ministru Prezidénsia Konsellu Ministru, Fidelis Manuel Leite Magalhães, apela hafoin ramata reuniaun iha Palásiu Governu, segunda ne’e.
Aleinde ne’e Governu anunsia levantamentu dadus ikus ba vítima inundasaun hamutuk na’in-27 mak mate no ualu seidauk konfirmadu durante inundasaun.
“Inundasaun akontese iha fatin barak iha territóriu nasionál, signifika la’ós de’it iha Dili maibé mós iha munisípiu sira hotu ne’ebé rezulta ho númeru família barak ne’ebé maka lakon hela fatin, uma, no mós to’o agora iha númeru vítima mortál hamutuk na’in-27 no na’in-ualu seidauk konfirmadu,” nia informa.
Notísia relevante: Dezastre naturál iha TL, ema 21 lakon vida
Governante ne’e dehan, inundasaun akontese iha Dili konfirma to’o agora númeru ema mate hamutuk 13 no ema ne’ebé mak lakon hela fatin hosi 100 to’o 8.000 ne’ebé evakua ba fatin emerjénsia sira hamutuk 12.
Númeru barak liu iha Don Bosco Comoro hamutuk uma-kain 500-resin kompostu hosi ema na’in-2.477, seluk iha Caicoli uma-kain 180 kompostu hosi ema na’in-815, edifísiu Ministériu Finansa uma-kain 656, Liceu ema na’in-528, Cruz Vermelha de Timor-Leste (CVTL) iha uma-kain 30, Infordepe uma-kaun 120-resin, Igreja Bidau iha uma-kain 35, klínika Bairru Pite, Madre Canossiana Balide, no fatin sira seluk tan.
Jornalista: Antónia Gusmão
Editora: Julia Chatarina
