iklan

NASIONÁL, HEADLINE, KAPITÁL

Dizastre naturál halakon ema 13 nia vida, uma-kain 1.579 evakua

Dizastre naturál halakon ema 13 nia vida, uma-kain 1.579 evakua

Inundasaun iha sidade Dili haree hosi leten a’as. Imajen/Machel Silveira

DILI, 05 abríl 2021 (TATOLI)—Udan ho intensidade boot provoka inundasaun kuaze iha kapitál Dili, iha domingu (04/04) madrugada, halo vítima barak maka evakua provizóriu ba fatin mahon hodi husik sira-nia hela fatin no balun lakon vida.

“Dezastre naturál hamosu inundasaun no rai halai iha munisípiu Dili konsege halakon ema na’in-13 nia vida,” refere nota ne’ebé Agência TATOLI asesu, segunda ne’e.

Vítima dizastre naturál ne’ebé lakon vida, kompostu hosi kampu merdeka ema na’in-haat, aldeia Moris foun Comoro na’in-tolu, Beduku na’in-tolu, Hera na’in-rua inklui membru Polísia ida.

Notísia relevante: Vítima dezastre naturál evakua ba edifísiu públiku neen

Aleinde ne’e, ekipa evaluasaun Protesaun Sivíl halo levantamentu dadus provizóriu no rejista uma-kain 1.579 evakua ba sentru evakuasaun balun.

Fatin hirak ne’ebé akumula vítima dizastre naturál mak hanesan Sentru Don Bosco uma-kain 500 kompostu hosi ema 2.437, edifísiu Protesaun Sivíl hamutuk 180 kompostu uma 815, salaun Ministériu Solidaridade Sosiál no Inkluzaun (MSSI) Caicoli hamutuk uma-kain 19, edifísiu Ministériu Finansa hamutuk ema 656, edifísiu Crus Vermelha de Timor-Leste (CVTL) hamutuk ema 69.

Nune’e mós, Eskola Liceu uma-kain 39 kompostu hosi ema hamutuk 528, Infordepe Balide akumula uma-kain 120, Igreja São João Bidau uma-kain 35 no fatin evakusaun balun seidauk alista hanesan Madre Salesiana Balide, Rádio Lorosa’e inklui Joao Paulo II.

Sekretáriu Estadu Protesaun Sivíl, José Gusmão dos Reis Martins, hamutuk ho Diretór Jerál Protesaun Sivíl, Ismael da Costa Babo, no Diretór Nasionál Jestaun Risku Dezastre Naturál, Agustinho Cosme Belo, halo ona enkontru urjente ho parseiru internasionál no nasionál hodi ko’alia kona-ba asuntu kalamidade ne’ebé akontese iha kapitál nasaun no haree posibilidade halo intervensaun.

Jornalista: Natalino Costa

Editora: Julia Chatarina

iklan
iklan

Leave a Reply

iklan
error: Content is protected !!