DILI, 07 abríl 2021 (TATOLI)–Ministériu Petróleu no Minerál (MPM), Víctor da Conceição Soares, hateten nia parte submete ona dokumentu investimentu ba planu enerjia renovável hosi empreza Green Energy Capital Group ba Ministériu Koordenadór Asuntu Ekonómiku (MKAE) atubele trata investimentu importante ne’e.
“Ami haruka ona empreza nia dokumentu sira ne’e ba MKAE tanba hanesan investimentu internasionál tenke liuhosi TradeInvest no Servisu Rejistu no Verifikasaun Emprezariál (SERVE) atu bele orienta no fó apoia polítika atu labele lakon osan saugate no tempu,” Ministru Víctor informa ba Agência TATOLI, iha Sentru Saúde Formosa, Dili, kuarta ne’e.
Ministru rasik ko’alia ona ho MKAE atu simu empreza ne’e tanba hatudu kompromisu atu investe.
“Ita hakarak bele kontinua filafali dokumentu foun atu investimentu ne’e bele avansa,” nia subliña.
Iha loron 29 marsu, Ministru hamutuk ho Diretór ba Projetu Tasi Mane hosi Timor GAP, Francisco Ferreira, konvoka reuniaun ho reprezentante hosi Green Energy Capital Group no Diretór Operasionál Asia ASPA Investment, Amit Daniel Schliesser, hodi ko’alia kona-ba planu investimentu ba enerjia renovavél iha Timor-Leste.
Governante ne’e haktuir, empreza ne’e halo ona estudu no akizisaun rai kuaze ektare 200 iha área Tasi Mane, ne’ebé Estadu atribui ona iha tinan 2016 maibé to’o agora seidauk hahú projetu.
Empreza estranjeiru ne’e iha tinan 2016 halo ona akordu ho Diresaun Jerál Eletrisidade Timor-Leste, ne’ebé Governu muda ona ba Eletrisidade de Timor-Leste, Empreza Públika (EDTL,E.P).
“Ami laiha envolvimentu, maibé investimentu ne’e besik projetu Tasi Mane, entaun Timor GAP mak fó apoiu no akompaña sira mai hasoru ami atubele ajuda sira halo investimentu,”nia akresenta.
Iha ámbitu reniaun, MPM husu atu empreza bele aprezenta fali dokumentu ne’ebé uluk iha atubele atualiza no reativa filafali komunikasaun.
MPM hakarak atu dudu investimentu ne’e tanba Timor-Leste presiza enerjia renovável ne’ebé sustentável atu labele depende de’it ba minarai.
“Ita haree mundu tomak muda ona polítika atu redús emisaun gás estufa no redús dependénsia petróleu, hodi halo enerjia renovável hanesan polítika Estadu tomak nia,” nia hatutan.
Estadu Timor-Leste ratifika ona polítika globál kona-ba ‘Green house effect’ iha tinan 2006 no kompromete ona iha Planu Estratéjiku Dezenvolvimentu Nasionál (PEDN), ne’ebé sita katak iha tinan 2015 tama ona ba faze enerjia renovável, maibé to’o agora seidauk bele atinje.
“Ita dehan tinan 2020, 40% atualiza maihosi enerjia renovável, maibé ita liu tiha, entaun Governu iha obrigasaun atu fó atensaun ba ida-ne’e no ami hanesan ajuda investimentu sira ne’e bele akontese,” nia subliña.
Jornalista: Florêncio Miranda Ximenes
Editora: Julia Chatarina
