DILI, 07 abríl 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes ho Embaixadór Estadu Unida Amérika (EUA), Kevin Blackstone, ko’alia kona-ba demokrasia ne’ebé la’o iha Timor-Leste.
“Ami ko’alia fortalesimentu demokrasia iha Timor-Leste, ha’u fó ezemplu situasaun ne’ebé akontese iha Burma ne’ebé hatudu katak militante sira la simu rezultadu eleisaun ne’ebé ké hatudu katak sira kontra demokrasia. Entaun ida-ne’e hanesan ezemplu ida ba Timor-Leste hodi tane aas demokrásia,” Embaixadór Blackstone informa ba jornalista sira, iha uma fukun, hafoin hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, kuarta ne’e.
“Tanba saida EUA apoiu Timor-Leste, tanba ita iha valór ne’ebé ita fahe ba malu hanesan demokrasia no respeitu ba direitu umanu,” nia katak.
Notísia relevante:Timor-Leste hatudu dalan demokrásia sai ezemplár ba eleisaun iha futuru
Embaixadór EUA ne’e nia pontu devista pesoál no reprezente pontu devista Governu EUA katak Timor-Leste halo ona progresu iha tradisaun demokrasia ne’ebé di’ak tebes.
“Hanesan ita haree ona iha EUA mós demokrasia ne’e iha ninia dezáfiu, maibé ita tenke esforsu nafatin hodi ultrapasa dezáfiu sira-ne’e hotu hodi lori nafatin demokrasia ba-oin,” nia dehan.
Maibé, nia dehan, laiha tán dalan seluk demokrasia de’it bele hametin relasaun entre EUA ho RDTL.
Prezidente Parlamentu Nasionál, Deputadu Aniceto Longuinhos Guterres Lopes, hateten, iha reuniaun ne’e ko’alia kona-ba dezáfiu sira, tanba Timor-Leste hanesan nasaun foun, nasaun ne’ebé iha konstrusaun hasoru, entaun iha dezáfiu iha dezenvolvimentu demokrásia Timor-Leste nian.
Notísia relevante:Nova Zelándia Apresia Kompromisu TL ba Demokrasia
Jornalista: Evaristo Soares Martins
Editór: Cancio Ximenes
