DILI, 08 abríl 2021 (TATOLI)—Ministériu Edukasaun Joventude no Desportu (MEJD), deside hodi adia kalendáriu ezame periúdu dahuluk, ba estudante Ensino Basico (EB) to’o Ensino Secundario Geral (ESG) no Ensino Secundario Tecnico Vocacional (ESTV), iha loron 19-24 abríl 2021.
“Ita deside adia kalendáriu ezame ne’e relasiona ho inundasaun ne’ebé afeta mós bá Munisípiu sira,” Ministru Edukasaun Joventude no Desportu, Armindo Maia, hateten ba jornalista Agência Tatoli, hafoin reuniaun Konsellu Ministru (KM) iha Palásiu Governu, kinta ne’e.
Notísia relevante:Estudante ESG-ESTV 30.369 sei partisipa ezame periúdu dahuluk
Governante ne’e esplika, desizaun hodi adia kalendáriu ne’e mós MEJD hakarak atu fó biban ba eskola-sira hodi prepara fila-fali kondisaun eskola, liuliu eskola-sira ne’ebé afetadu hosi inundasaun iha 4 abríl.
Tanba ne’e, MEJD husu ba dirijente eskola-sira iha territóriu tomak atu organiza profesór no estudante-sira hodi bele prepara kondisaun eskola ho di’ak, nune’e bele hasoru ezame ho susessu.
Entretantu, kalendáriu ne’ebé MEJD deside antes ne’e, inísiu ezame periúdu dahuluk iha loron 12-17 abríl 2021.
Antes ne’e Diretór Jerál ESG-ESTV, Deolindo da Cruz, hateten dadus jerál ba totál estudante ne’ebé MEJD iha hamutuk 73.166.
Hosi númeru ne’e, estudante na’in 30.369 mak sei tuir ezame periúdu dahuluk, mai hosi Munisípiu ualu hanesan, Manatuto, Manufahi, Ainaro, Aileu, Ermera, Bobonaro, Liquiça no Rejiaun Administrativa Espesiál Oe-cusse Ambeno (RAEOA).
Jornalista: Tomé Amado
Editór: Cipriano Colo
