DILI, 09 abríl 2021 (TATOLI)-–Governu liuhosi Bee Timor-Leste, Empreza Públika (BTL, E.P) halo ona kálkulu ba kustu estragu kanalizasaun ka sistema bee hamutuk 26 ho kustu millaun $2,5, ne’ebé hetan sobu hosi inudasaun akontese iha domingu (04/04) iha kapitál Dili.
Prezidente Konsellu Administrasaun BTL. E.P, Carlos Peloi dos Reis, hateten, dezaste naturál ne’ebé akontese konsege estraga sistema bee moos kuaze 50% no fó impkatu ba komunidade barak mak la asesu ba bee iha Kapitál Dili.
“Ita-nia bomba sistema bee moos kuaze 26 iha Dili laran ne’e a’at hotu ne’ebé ohin ami informa ba Komisaun Administrasaun Fundu Infraestutura (KAFI) no ami-nia estimasaun provizóriu, ita lakon osan kuaze millaun $2,5,” Prezidente Konsellu Administrasaun BTL hateten hafoi partisipa reniaun KAFI iha edífisiu Ministériu Finansa (MF), Aitarak-Laran, Dili, sesta ne’e.
Hosi totál sistema bee 26 ne’e, empreza estatál ne’e konsege hadi’a ona balun maibé falta tan balun maka seidauk.
“Ami hahú serbisu iha loron 05 abríl to’o agora no konsege rekupera sistema bee 10 ona, maibé falta 16 mak daudaun ekipa esforsu iha terrenu atu hadi’a,” nia akresenta.
Sistema distribuisaun ne’ebé konsege hadi’a no reativa filafali mak hanesan Kuluhun B, Bidaun Masaur, Mascarinhas II, Bairro Pité, Comoro A, B, C, D no G no seluk tan.
Enkuantu, seluk sei esforsu atu normaliza fali mak hanesan iha Kuluhun, Becora II, Becora mota ulun ho Aida Horta trasmisaun mak bee sobu no seluk tan.
“Ita-nia komunidade balun bele ona asesu bee hosi sistema distribuisaun 10, seluk iha prosesu atu hadi’a fali ne’ebé tékniku sira sei iha terrenu no esforsu-an, nune’e komunidade sira bele asesu bee,” nia hatutan.
Maibé, Responsável ne’e rekoñese todan liu mak komunidade ne’ebé asesu bee hosi sistema bee-moos área Manleuana to’o Palapasu tanba sistema bee mota ulun sobu kuaze 60% ne’ebé tuir estimasaun bele rekupera iha fulan-rua nia laran.
Nune’e, BTL, E.P ho parseiru dezenvolvimentu sira halo ona instalasaun ba bee no tanke sira iha bairru afetadu sira kuaze iha Dili laran tomak atu komunidade sira bele asesu bee.
“Ita prioritiza komunidade sira atu installa tanke no lori bee ba kada bairru sira atu komunidade bele asesu bee” nia subliña.
Jornalista: Florêncio Miranda Ximenes
Editora: Julia Chatarina
