DILI, 09 abríl 2021 (TATOLI)- Udan-boot ne’ebé akontese iha domingu (04/04), lori estragu ba fasilidade públiku, hanesan estrada, ponte, eletrisidade no kanalizasaun bee-moos iha kuaze territóriu nasionál. Nune’e, fó impaktu boot ba movimentu transporte nian, asesu eletrsidiade no asesu bee-moos ba komunidade sira iha area afetadu dezastre naturál.
Iha Aldeia Hatu-Ahu-Hun, Suku Hohorai, Postu Administrativu Laclo, Munisípiu Manatuto, estrada ho ponte ki’ik sira ligasaun Manatuto Vila ba área ne’ebá hetan estragu total. Nune’e difikulta tebes transporte públiku no privadu atu asesu ba suku sira iha Postu Administrativu Laclo nian.
Kondisaun ne’e halo komunidade Suku Hohora, sesta dadeer ne’e, obrigadu halo sakrifisiu hasaan de’it inan-feton, Diana da Silva, tinan 16, ne’ebé moras todan hodi la’o ain hosi nia hela fatin Hohorai ba Laclo ho distánsia kilómetru 27.
To’o iha Postu Saúde Laclo la bele halo atendimentu ba pasiente ne’e tanba kondisaun moras grave tebes no tenke evakua orjente mai Ospitál Manatuto Vila. Ho nune’e, família sira kontinua hasaan fali lori la’o ain pasiente inan-feotn ne’e hosi Laclo mai Manatuto-vila ho distansia kilómetru 17 tan.
Xefe Suku Hohorai, Albino Soares, ba Agência Tatoli liuhosi telefone informa, kauza hosi dezastre naturál hodi halo entrada kotu difikulta tebes karreta ambulánsia hosi Manatuto vila atu ba sira-nia suku transporta inan-feton moras todan ne’e. tanba ne’e, família sira tenke pasiénsia hasaan de’it hodi lori ba Postu Saúde Laclo.
“Udan boot ne’e rezulta estrada kotu hotu, karreta ambulánsia labele mai, tanba ne’e família no komunidade tenke halo evakuasaun hodi salva inan-feton ho hasaan la’o ain hosi Suku Hohorai ba Laclo ho distánsia kilómetru 27, para bele salva inan feto ne’e nia vida,” Xefe Suku Albino Soares haktuir.
Hafoin lori pasiente ne’e too Postu Saúde Laclo, Xefe Suku Albino Soares hateten, tanba kondisaun estrada iha área ne’ebá mós kotu hotu, nune’e família tenke pasiénsia kontinua hasaan pasiente la’o tan hosi Laclo ba Manatuto-vila ho distánsia kilómetru 17.
Autoridade suku ne’e hatutan, dezastre naturál ne’ebé akontese rezulta rai monu no estrada kotu iha área sira hanesan Condar, Hahiho, Rembor, Laclumesak, Uma Caduac, Uma Naruk Licore no fatin hamutuk 16 ne’ebé risku ba dezastre.
Autoridade Suku ne’e husu ba Governu Timor-Leste liuhosi Ministériu Obras Publika (MOP) haruka ekipamentu pezadu atu bele dudu sees rai monu taka estrada no hadi’a fila fali estrada no ponte ki’ik sira ne’ebé kotu.
Tuir dadus ne’ebé autoridade suku ne’e rekolla, iha Suku Hohorai rejista uma hamutuk 28 maka hetan estragus totál no restu bee no tahu-nurak tama.
Postu Administrativu Laclo iha suku haat, hanesan Suku Hohorai, Lacumesac, Uma Caduac no Uma Naruc ho aldeia 21 ne’ebé jeografikamente dook hosi Manatuto ne’ebé maioria povu moris nu’udar vida agrikultura.
Jornalista : Eugénio Pereira
Editór : Francisco Simões
