DILI, 09 abríl 2021 (TATOLI)—Organizasaun Saúde Ba Ema Hotu (SABEH) hala’o ona tratamentu saúde gratuita, ba populasaun afetadu inundasaun hamutuk 1.500.
“Durante loron lima ami halo atendimentu ba komunidade. Númeru ne’e sei kontinua aumenta tanba pedidu hosi komunidade afetadu barak liu,” Diretór ezekutivu SABEH, Andrezinho Belo, hateten ba jornalista-sira iha kampaun UN, Caikoli, sesta ne’e.
Notísia relevante:MESSK oferese nesesidade bázika ba vítima inundasaun iha Hera
Fatin refujiadu ne’ebé SABEH fó atendimentu médiku mak hanesan, Kapela João Paulo II Tasi-tolu, eis patrimóniu Estadu Tasi-tolu, Bairru Masin-Lidun, Komunidade Padre Canosiana-sira, Dominicana no Parókia São Tiago, Hera.
Ai-moruk ne’ebé SABEH uza hodi halo tratamentu ba komunidade, mai hosi Servisu Autónomu Medikamentu no Ekipamentu Saúde (SAMES).
Alende halo taramentu saúde, SABEH mós fó apoiu nesesidade bázika ba komunidade afetadu-sira, ne’ebé hetan hosi doadór-sira hanesan roupa, lona, fos, super mie, mina goreng, biti, balde, manta no seluk tan.
Durante hala’o tratamentu saúde, SABEH mós hetan apoiu medikamentu no materiál balun hosi organizasaun spend it well hosi Austrália.
“Agora daudaun membru organizasaun ne’e hamutuk hela ho ekipa SABEH, hodi halo tratamentu no identifika problema ne’ebé komunidade hasoru,” médiku ne’e informa.
Grupu seluk ne’ebé apoiu SABEH iha momentu ida ne’e mak hanesan, grupu Youth Solidarity kompostu hosi joven-sira hosi Irlanda, inklui Timoroan-sira iha Inglaterra.
Tuir planu, SABEH sei hala’o tratamentu saúde sai hosi Dili ba munisípiu-sira ne’ebé afetadu mós ba inundasaun.
Tipu moras ne’ebé SABEH deteta durante halo tratamentu mak hanesan, infesaun via respiratóriu, diaréia no isin katar.
Ekipa voluntáriu SABEH hamutuk 125, maibé situasaun inundasaun balun fó apoiu ba organizasaun-seluk, nune’e sira ne’ebé ativu hamutuk na’in 39 kompostu hosi médiku 24, enfermeiru na’in sia, parteira na’in ida, saúde públika na’in haat no paramédiku na’in ida.
Jornalista: Felicidade Ximenes
Editór: Cipriano Colo
