DILI, 10 abril 2021 (TATOLI)–Aviaun Tri-MG Airlines PKYGH ho tipu B737-300F, aban, sei halo voo hosi Singapura mai Dili hodi transporta apoiu umanitáriu hosi Governu Japaun ba Governu Timor-Leste, relasiona ho inundasaun ne’ebé akontese domingu (04/04) foin lalais ne’e.
Apoiu ida-ne’e Governu Japaun fó liu hosi sira-nia ajénsia Japaun International Coopration Agency (JICA) iha Timor-Leste.
“Parte Autoridade Aviaun Sivil Timor-Leste (sigla portugés AACTL), hasai ona fligth approval, hodi autoriza aban aviaun Tri-MG Airlines voo hosi Singapura mai Dili,” sita hosi fligth approval ne’ebé Agência Tatoli asesu hosi parte Autoridade Aviaun Sivil Timor-Leste, sábadu ne’e.
Iha fligth approval ne’e, sita mós katak aviaun Tri-MG Airlines voo hosi Singapura mai Dili sei transporta de’it apoiu umanitáriu hosi JICA nian ba Timor-Leste ka JICA‘s Humanitarian Relief Gooods.
Aviaun ne’e sei tun iha Areoportu Internasionál Nicolau Lobato Dili, aban (domingu, 11/04) iha tuku 12:45. Hafoin hatun tiha sasán, aviaun ne’e sei voo fila-fali ba Indonézia.
Jornalista: Natalino Costa
Editór: Cancio Ximenes
