DILI, 10 abríl 2021 (TATOLI)–Ministru Edukasaun Juventude no Desportu (MEJD), Armindo Maia, hateten ekipa konjunta ministeriál kompostu hosi UNICEF inklui Embaixada Portugál hala’o vízita hodi haree no fó apoiu ba vítima dezastre naturál ne’ebé evakua no hela iha sentru evakuasaun sira iha Dili.
Armindo Maia hatutan, objetivu hozi vizita ne’e atu hamutuk ho vitima sira hodi hakma’an sofrementu ne’ebé vítima sira enfrenta hafoin inundasaun ne’ebé akontese iha domingu (04/04) semana kotuk. Iha vizita ne’e, ekipa konjunta ME no UNICEF fó apoiu umanitáriu ba populasaun hamutuk 1.809 hosi xefe família 353 ne’ebé refujia iha eskola haat inklui iha edifísiu INFORDEPE.
“Ami hatene iha parte barak mak fó ona apoiu ai-han ba imi. Tan ne’e, ami mai la lori ai-han barak ba imi, ami mai lori uitoan de’it ho mós apoiu emerjénsia atu ita-bo’ot sira bele utuliza durante tempu naruk,” Armindo Maia tatoli ba vítima dezastre naturál ne’ebé hela iha Salaun INFORDEPE Balide, Dili, sábadu ne’e.
Ministru ne’e esplika, apoiu emerjénsia ne’ebé sira fahe ba vítima sira mak hanesan kulxaun, sasán halimar ba labarik sira, sabaun, pastadente no eskova, mina, no apoiu sira-ne’e Ministériu Edukasaun utuliza hosi estoke ne’ebé mak antes ne’e asegura hela iha dirasaun lojistíka.
Iha fatin hanesan, Embaixadór Portugál, José Pedro Machado Vieira, hateten Portugál ho Timor-Leste nu’udar belun ida di’ak, bainhira haree Estadu Timor hasoru problema dezastre naturál povu barak mak lakon sasán, lakon familia no uma, Governu Portugál hola parte kedan iha situasaun ne’e.
“Portugál la tuur nonook. Portugal hakarak sente sofrementu ida-ne’e hamutuk ho povu Timor. Portugál prontu apoiu kualker saida de’it, atu povu Timor ne’ebé afetadu no agora refujia iha sentru evakuasaun sira ne’e bele iha nafatin esperansa ba moris,” nia dehan.
Alende ne’e, Koordenadór Sentru Evakuasaun EBF Metiaut, Ermenegildo da Silva, haktuir populasaun 85 la’ós hamlaha maka halai mai hela iha EBF Metiaut ne’e, maibé hela iha fatin ne’e tanba salva vida hosi dezastre naturál.
“Sira lubuk ne’e hela iha rai lolon hasoru situasaun ida hanesan, rai-monu taka sira-nia uma, tan ne’e sira tun mai tetuk hodi asegura aan, tanba familia no oan sira-ne’ebé sei ki’ik,” nia hateten
Tuir dadus, vítima dezastre naturál ne’ebé refujia iha eskola haat inklui INFORDEPE hamutuk 1,809 ho xefe familia hamutuk 353. Parte INFORDEPE rasik rejista populasaun 589 ho uma-kain 112, Eskola ESJ 4 Setembru iha populasaun hamutuk 235 ho uma-kain 45, EBF Metiaut na’in 85 hosi uma kain 15, EB/ESJ 10 Desembro iha na’in-64 ho xefe família hitu (7) no EBF 12 Outubro iha populasaun 836 hosi xefe famíla 174.
Jornalista: Tomé Amado
Editór: Cancio Ximenes
