DILI, 12 abríl 2021 (TATOLI) – Tama ba loron sia (9) ona, hosi loron 04 to’o loron 12 abríl ne’e, família sira hamutuk ho autoridade lokál Postu Administrativu Laclo buka tuir abitante na’in-10 ne’ebé lakon iha dezastre naturál.
Hosi esforsu ne’e, família ho autoridade sira hetan ona na’in-neen (6), kompostu hosi na’in-haat moris no na’in-rua mate, maibé na’in-haat seluk to’o agora seidauk hetan sira-nia paradeiru ka sira-nia isin-mate.
Notísia Relevante : Família hasaan inan ida moras la’o kilómetru 44
Administradór Postu Administrativu Laclo, Samuel Rodriques Pereira informa, udan no anin boot ne’ebé akontese iha loron 03 to’o loron 04 abríl 2021, halo mota konsege lori ema na’in-10 nu’udar abitante hosi Suku Uma-Kaduak na’i- sia (9) ho Suku Uma-Naruk na’in-ida (1).
Dadus hosi Administradór Postu Administrativu Laclo, Munisípiu Manatuto nian katak vítima sira ne’ebé mota lori balun hela iha uma to’os laran ne’ebé besik mota ninin, maka hanesan, Joana Bui Pelu, Francisco Noronha, Odete de Araújo, Madalena Gomes, Ajanu Noronha, Emilia Gomes, Marquito D. S. Pinto, Deniz Noronha, Malicau Soares ho Angelino da Silva.
“To’o agora família sei buka tuir nafatin vítima na’in-haat ne’ebé mota lori seidauk hetan,” Administradór Samuel Rodrigues Pereira, informa Agência Tatoli liuhosi telefónika, segunda ne’e.
Vítima sira ne’ebé mota lori seidauk hetan maka hanesan Emilia Gomes, Mariquitu D. S. Pinto, Madalena Gomes ho Odete de Araújo.
Vítima sira ne’ebé mota lori no konsege buka hetan ho kondisaun sei moris maka hanesan, Francisco Noronha, Deniz Noronha, Ajanu Noronha ho Milcon Soares. Enkuantu, vítima mota lori ho kondisaun mate ona maka Joana Bui Pelu ho Angelino da Silva/Mamodo.
“To’o agora Governu seidauk lori apoiu ruma mai fó ba vítima sira, mezmu sira ne’ebé mate no sira ne’ebé moris,” Samuel Rodrigues Pereira haktuir.
Nia hatutan, uma lubuk ida, inklui infraestrutura bázika hanesan, estrada, eletrisidade, ponte no bee-moos hetan estragus hodi fó impaktu ba komunidade nia moris loron-loron nian. Tanba ne’e, Samuel Rodrigues Pereira, husu ba Governu atu bele koloka ekipa pezadu hodi hadi’a hikas estrada, eletrisidade no kanalizasaun bee-moos ne’ebé aat ona.
Jornalista : Eugénio Pereira
Editór : Francisco Simões
