DILI, 12 abríl 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, to’o loron segunda, (12/04), realiza ona pagamentu ba kompañia lokál hamutuk 87 ne’ebé fornese ona Cesta Bázika, ho totál pagamentu $ 22.354.643.
Totál kompañia no pagamentu hirak ne’e inklui ona ho pagamentu ba kompañia 25 ne’ebé mak MF halo ona iha semana hirak liubá.
Notísia relevante: MF halo pagamentu Cesta Bázika kompañia 25 totál millaun $5,2
“Pagamentu hirak ne’e hafoin Ministériu Finansa simu pedidu pagamentu hosi Ministériu Turizmu, Komérsiu no Indústria (MTKI) hamutuk 50 no realiza hotu ona pagamentu ne’e ho montante $ 10.635.966,” refere nota ne’ebé Agência TATOLI asesu, segunda ne’e.
Aleinde ne’e, MF mós simu pedidu pagamentu hosi Sekretaria Estadu Kooperativa (SEKoop) hamutuk 24 no husi númeru ne’e, pedidu pagamento 21 mak realiza ona ho montante $10.218.612.
Notísia relevante: SEKoop simu dokumentu pedidu pagamentu fornesedór Cesta Bázika hamutuk 14
“Pedidu pagamentu tolu haruka filafali ba SEKoop atu kompleta rekezitu pagamentu tuir lei haruka molok halo pagamentu,” haktuir nota.
Simu tan pedidu pagamentu hosi Sentru Lojístiku Nasionál (CLN, sigla Portugés) hamutuk 20, ne’ebé hosi númeru ne’e, halo ona pagamentu 16 ho montante $1.500.065, enkuantu pedidu pagamentu haat tenke haruka filafali ba CLN atu kompleta rekezitu pagamentu tuir lei haruka.
“Ministériu Finansa liuhosi Sekretariadu Tékniku Fundu COVID-19, to’o ohin loron seidauk simu pedidu pagamentu hosi Ministériu Agrikultura no Peska,” informa nota hosi MF.
Notisia Relevante: MAP submete pedidu pagamentu Cesta Bázika kompañia 17 ba MF
Sekretariadu Tékniku kontinua serbisu hamutuk ho ministériu implementadór programa Cesta Bázika atu aselera prosesu pagamentu ba kompañia sira ne’ebé mak fornese ona ai-han.
Bainhira dokumentu pedidu pagamentu kompletu, loos no prienxe ona rekezitu pagamentu tuir lei haruka, Sekretariadu Tékniku Fundu COVID-19 sei prosesa no sei realiza pagamentu tuir regra ne’ebé vigora.
Maibé, molok Sekretariadu Tékniku realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu ou income tax 0,5% hosi totál rendimentu konforme Lei Tributária haruka.
“Kompañia sira tenke aprezenta sira-nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál,” reforsa nota ofisiál ne’e.
Karík kompañia fornesedór-sira iha pergunta ruma ka presiza informasaun liután kona-ba asuntu impostu, Autoridade Tributária (AT) disponível kontaktu ka vizita portál relasiona ho pagamentu impostu, submisaun relatóriu mensál ou annuál no pedidu emisaun ba sertidaun dívida.
Pagamentu impostu mós bele halo liohusi mákina ATM P24 no kontribuinte sira la presiza ba forma tan iha banku komersiál sira hanesan uluk.
Jornalista: Antónia Gusmão
Editora: Julia Chatarina
