DILI, 11 abríl 2021 (TATOLI)—Dadus finál ne’ebé autoridade lokál suku Caicoli, Postu Administrativu Vera Cruz, Munisípiu Dili, rekolla, iha família 1.116 iha suku ne’e, sira-nia uma hetan estragus hosi inundasaun ne’ebé akontese iha 04 abríl.
“Ami-nia dadus kompletu ona, hein de’it atu submete ba Postu Administrativu,” Xefe Suku Caicoli, Hipólito Marques, hateten jornalista Agência Tatoli via telefónika, domingu ne’e.
Notísia relevante:Xefe suku Fatuhada hahú halo levantamentu dadus vítima afetadu inundasaun
Tuir verifikasaun autoridade lokál katak, uma-kain hirak-ne’e inundasaun estraga totál sasán uma-laran hanesan zelera, armáriu, kulxaun, bikan, kanuru no seluk tan.
“Governu mak haruka ita rekolla dadus no ha’u garante katak, buat hotu-hotu sei haruka bá, maibé sei haree tuir kategória estragus,” nia hateten.
Autoridade lokál ne’e informa, durante inundasaun populasaun iha suku ne’e evakua ba sede suku, eskola Rumbia, Liceu no edifísiu Bombeiru, oras ne’e populasaun fila ona ba ida-idak nia hela-fatin tanba bee tun ona.
Nia relata, durante verifikasaun iha família hamutuk 150 mak laiha duni hahán no seidauk hetan apoiu hosi Governu, nune’e autoridade lokál ho inisiativa husu apoiu hosi loja Fortuna Star King, hodi fornese fos no nesesidade bázika ba família hirak-ne’e.
Situasaun ne’e mós autoridade lokál informa ona ba parte Ministériu Administrasaun Estatál (MAE), ne’ebé distribui ona formuláriu atu ida-idak prienxe, nune’e bele atende iha tempu badak.
Família 1.116 ne’ebé afetadu ba inundasaun iha Suku Caicoli mai hosi aldeia 01 iha uma-kain 226, aldeia 02 iha 231, aldeia 03 iha 216, aldeia 04 iha 261 no aldeia 05 iha 199.
Jornalista: Osória Marques
Editór: Cipriano Colo
