DILI, 12 abríl 2021 (TATOLI)—Líder karismátiku Kay Rala Xanana Gusmão gasta loron tomak, hahú hosi tuku 08.00 dadeersan to’o tuku 18.23 kalan, Xanana Gusmão tuur hein nafatin iha odamatan-boot Sala Izolamentu Vera Cruz nian hodi hein desizaun ikus hosi Governu.
Notísia Relevante: Komodoro Pedro Klamar Fuik konvense Xanana kona-ba mate-isin COVID-19
Líder Nasionál Xanana Gusmão, gasta nia tempu no enerjia tomak ba loron ida ohin, hodi ezije de’it ba Governu atu entrega mate-isin Armindo Borges (47) hosi Suku Manu-Tasi, Postu Administrativu Ainaro, Munisipiu Ainaro, ne’ebé hakotu iis tanba sofre COVID-19 ne’e, ba ninia família atu haloot ho dignu.
Entretantu, hosi parte família ho karreta privadu marka Hilux ho xapa-matríkula 22.550, prepara hela kaixaun iha sala izolamentu nia oin, hamutuk ho Xanana Gusão, hodi hein desizaun ikus hosi Governu atu entrega mate-isin refere ba sira liman, hodi lakohi koopera atu hakoi mate-isin tuir protokolu COVID-19 nian no ezije beibeik.
“Mate-isin tenke entrega ba família, lae to’o semana ida mós ha’u hein iha-ne’e,” Xanana Gusmão hateten.
Maibé, prezensa Komodoro Donaciano Costa Gomes ‘Pedro Klamar Fuik’ konsege konvense Xanana, maibé seidauk fó-sai rezultadu loloos no momoos.
Hafoin halo koordenasaun, Xanana Gusmão no Klamar Fuik, hamriik hodi loke kaixaun ne’ebé prepara hosi família.
Hafoin ne’e, Komdoro Klamar Fuik hakat tama ba sala izolamentu nia laran, no sai fali mai hodi kontinua dada-lia ho Xanana Gusmão no hafoin ne’e hakat fila-fali ba nia uma.
Jornalista: Evaristo Soares Martins
Editór: Cancio Ximenes
