DILI, 13 abríl 2021(TATOLI)—Komunidade Fatuhada, postu administrativu Dom Aleixo, munisípiu Dili, organiza malu hodi halo limpeza jerál hamos foer, hafoin inundasaun ne’ebé akontese iha domingu (04/04).
Xefe suku Fatuhada, Marcelino Soares, hateten limpeza ne’e mai hosi inisiativa komunidade tanba haree foer no taho barak.
“Ida-ne’e limpeza hosi inisiativa komunidade, tanba ne’e komunidade sira tenke partisipa ativa hodi bele hafurak ambiente ne’ebé saudável,” líder komunitáriu dehan ba Agência TATOLI, via telefónika, tersa ne’e.
Nia dehan, limpeza ne’e tenke hosi ida-idak nia an no labele hein de’it Governu tanba iha mós servisu barak ne’ebé presiza halo.
“Ita tenke ho konsiénsia halo limpeza no labele hein de’it Governu, tanba ne’e maka ita tenke ativa halo limpeza hodi hamoos ita-nia hela fatin,” tenik autoridade lokál suku ne’e.
Iha sorin seluk, Maria de Araújo, konsidera limpeza ne’e importante, tanba ne’e presiza partisipa ema barak.
“Ida-ne’e importante no husu ita atu partisipa liután atubele ita-nia hela fatin moos hafoin inundasaun,” nia dehan.
Tuir observasaun Agência TATOLI iha terrenu, limpeza iha suku laran ladún hetan partisipasaun másimu hosi komunidade sira.
Jornalista: Natalino Costa
Editora: Julia Chatarina
