DILI, 13 abríl 2021 (TATOLI)—Ministra Saúde (MS), Odete Maria Freitas Belo, preokupa ho família matebian Armindo Borges, na’in-rua ne’ebé pozitivu COVID-19, oras ne’e la’o livre hela iha sala izolamentu Vera Cruz.
“Ne’e mak ita tau kestaun. Ita husik tanba ita la rona-malu. Agora ida ne’e ita atu fó sala ba sé. Ita atu fó sala ba Ministériu Saúde ou ba Governu, labele tanba ita hotu tenke kontribui,’’ Odete Maria Freitas Belo, hateten ba jornalista-sira iha Parlamentu Nasionál, tersa ne’e.
Notísia relevante:COVID-19: Mate-isin Armindo Borges konserva ona iha konjeladór
Governante ne’e mós preokupa ho situasaun iha sala izolamentu Vera Crus ne’ebé ema barak halibur-malu no ema-sira ne’e barak la uza máskara iha fatin ne’ebé risku ba COVID-19.
“Ema-sira ne’e uza máskara ka la’e, sira ba besik avó Nana entaun ida ne’e ita hotu-nia preokupasaun. Tanba ita la hatene se sira lori moras ba avó, se avó la hetan moras di’ak, maibé bainhira moras sé mak atu responsabiliza,” Odete preokupa.
Horisehik, Koordenadór Forsa-Tarefa ba Prevensaun no Mitigasaun, Rui Maria de Araújo esplika katak, hafoin deteta pozitivu SARS-CoV-2 iha matebian Armindo Borges, ekipa saúde foti mós amostra hosi membru família na’in-tolu ne’ebé akompaña. Hosi nai’n -tolu ne’e, na’in-rua mak pozitivu.
Jornalista: Felicidade Ximenes
Editór: Cipriano Colo
