DILI, 13 abríl 2021 (TATOLI)–Lider istóriku, Kay Rala Xanana Gusmão, husu ba joven sira ne’ebé hakilar no hawelok iha área sentru izolamentu Vera Cruz atu tuur hakmatek no labele hakilar hodi hein desizaun ikus Governu atu entrega mate-isin Armindo Borges ba família hodi haloot.
“Ha’u husu imi tuur hakmatek no lalika hakilar ba mai, tanba ha’u mai iha ne’e la’ós halo asaun kontra Governu, maibé atu husu Governu entrega mate isin ba família hodi ba hakoi,” Xanana Gusmão hateten ba joven sira iha areadór sentru izolamentu.
Notísia relevante: Lere husu Polísia haruka fila manifestante sira
Biban ne’e, eis Prezidente Repúblika ne’e enkoraja jovem sira atu kontinua kontribui ba páz no estabilidade, atu hamutuk hein desizaun.
“Ita-nia asaun ne’e atu halo korije ba intervesaun Governu nia ba COVID-19, atu haloos hodi povu bele fiar COVID-19, ne’ebé tenke mantein kalma,” Líder karizmátiku ne’e akresenta.
Eis Primeriu-Ministru ne’e apela ba joven sira atu kuidadu-an no fiar ba katak moras COVID-19 ne’e iha.
“Ha’u husu imi atu fiar COVID-19, ne’ebé tenke kuidadu-an,” nia fó hanoin.
Tuir observasaun Agência TATOLI iha terrenu, nota katak joven kuaze 100 hakilar no haklalak iha areadór sentru izolamentu nia tuku 16:00 ne’e.
Maski nune’e, mensajen Xanana konsege konvese joven sira hosi sira hakmatek hodi akompaña situasaun.
Entretantu, Xanana Gusmão husu mós ba Polísia Nasionál Timor-Leste (PNTL) atu labele duni joven sira ne’ebé hakmatek ona.
Jornalista: Florêncio Miranda Ximenes
Editora: Julia Chatarina
