DILI, 14 abríl 2021 (TATOLI)—Governu Australianu apoia materiál emerjénsia tonelada 27-resin ba Governu Timor-Leste (TL), ne’ebé transporta ho aviaun Boeing Royal Australian Air Force C-17A Globemaster.
Aviaun ne’e to’o iha Aeroportu Internasionál, Prezidente Nicolau Lobato, Comoro, Dili iha tuku 14:45 otl.
Notísia relevante:Japaun apoia manta 5.000 ba vítima dezastre naturál
”Apoiu emerjénsia ne’ebé Governu Austrália liu hosi Embaixada iha TL oferese hamutuk tonelada 27-resin,” Embaixadór Austrália iha TL, Peter Roberts, ko’alia ba jornalista-sira iha Aeroportu Comoro, kuarta ne’e.
Diplomata ne’e hateten, materiál hirak-ne’e hola parte ba Austrália-nia pakote asisténsia emerjénsia ho montante dolar Austrália millaun 7.
Tuir planu, materiál hirak ne’e sei distribui liu hosi Austrália-ninia parseiru umanitáriu hanesan Organizasaun Naun Governamentál (ONG)-sira.
Austrália orgullu tebes tanba bele halo kooperasaun ho Governu TL, hodi apoia esforsu atu prevene COVDI-19 no rekoperasaun ba vítima inundasaun.
Materiál asisténsia emerjénsia hirak-ne’e aumenta ba Austrália-nia apoiu ne’ebé fornese ona ba ema barak iha sentru evakuasaun-sira.
Ohin mós Austrália oferese ekipa epidemiolojísta seniór ba asisténsia médika na’in-rua ne’ebé viajen hamutuk ho aviaun ida-ne’e no atu serbisu hamutuk ho ekipa vizilánsia Ministériu Saúde (MS) hodi prevene COVID-19.
Materiál asisténsia emerjénsia hirak ne’e mak hanesan hahán, materiál ba tenda, ijiéniku no mós Ekipamentu Protesaun Pesoál (PPE).
Jornalista: Felicidade Ximenes
Editór: Cipriano Colo
