DILI, 14 abríl 2021 (TATOLI)—Estudante na’in 377 hosi eskola Ensinu Báziku Sentrál (EBC sígla portugés) síklu tolu Abat-oan Munisípiu Manatuto, preparadu atu tuir ezame periúdu dahuluk, iha 19 abríl.
Diretór EBC Abat-oan, António Alfredo dos Reis Hornai, hateten estudante hirak ne’e preparadu tanba prosesu aprendizazen la’o hanesan baibain oras ne’e.
Notísia relevante:MEJD adia ezame periúdu dahuluk
“Ami-nia prosesu aprendizazen durante ne’e la’o normál hela. Ami hatene de’it mak 19 abríl sei tuir ezame,” António Alfredo dos Reis Hornai, hateten ba jornalista Agência Tatoli via telefónika, kuarta ne’e.
Preparasaun kona-bá elaborasaun matéria remata ona no hein de’it atu realiza ezame, bainhira kalendáriu laiha mudansa.
Oras ne’e daudaun, profesór ne’ebé hanorin iha eskola ne’e hamutuk na’in 18, inklui guarda eskola na’in-ida.
Jornalista: Tomé Amado
Editór: Cipriano Colo
