DILI, 14 abríl 2021 (TATOLI)—Reuniaun Konsellu Ministru (KM) iha kuarta ne’e, rona aprezentasaun hosi Sala Situasaun-Sentru Integradu Jestaun Krize (CIGC, sigla portugés) kona-ba pontu situasaun epidemiolójiku rai-laran.
Hafoin analiza aprezentasaun, KM halo aprovasaun Projetu Rezolusaun Governu baimpozisaun Serka Sanitária iha munisípiu Ermera, Covalima no Ainaro to’o loron 02 maiu.
Aleinde ne’e, KM aprova Projetu Rezolusaun Governu ba kontinuasaun impozisaun serka sanitária iha munisípiu Dili, Baucau no Viqueque to’o loron 02 maiu.
Notísia relevante: Governu renova serka sanitária iha munisípiu tolu
Tuir Portavós Governu no Ministru Prezidénsia Konsellu Ministru, Fidelis Manuel Leite Magalhães, ezekutivu sira estende Serka Sanitária Dili, Baucau no Viqueque to’o implementasaun Estadu Emerjénsia da-XII ramata iha maiu.
“Estensaun Serka Sanitária depende ba evolusaun COVID-19,” Ministru Fidelis hateten liuhosi konferénsia imprensa hafoin reuniaun KM, iha Palásiu Governu.
Governante ne’e dehan, impelementasaun Serka Sanitária ne’e, bandu sirkulasaun ema entre munisípiu ne’ebé mensiona no divizaun administrativa sira seluk.
“Exetu iha kazu ho fundamentu forte tanba razaun sira hanesan seguransa públika, saúde públika, asisténsia umanitária, manutensaun sistema sira abastesimentu públiku ka ba realizasaun interese públiku nian,” nia subliña.
Daudaun ne’e, Governu iha hela períodu implementasaun Estadu Emerjénsia da-XII, ne’ebé hahú implementa iha oras 00:00 loron 03 abríl to’o oras 23:59 loron 02 maiu 2021.
Notísia relevante: Medida EE da-XII, kuarentena bele iha uma ho despaisu MS
Razaun Governu impoin Serka Sanitária iha munisípiu tolu tanba daudaun rejista ona COVID-19, iha Ermera 34, Covalima 45, Ainaro ualu.
Enkuantu, kazu foun ohin loron 17 (iha Dili hotu), rekuperadu 14, nune’e kazu ativu ne’ebé iha sala izolamentu hamutuk 547, mate rua.
Nune’e, kazu rejistadu COVID-19 hosi marsu 2020 to’o agora hamutuk 861 no to’o agora klasifikasaun transmisaun hanesan cluster.
Jornalista: Antónia Gusmão
Editora: Julia Chatarina
