KKLN husu Governu solusiona polémika mate-isin Armindo Borges
DILI, 14 abríl 2021 (TATOLI)-Prezidente Konsellu Kombatente Libertasaun Nasionál (KKLN), Vidal de Jesus “Riak Leman”, husu ba Governu atu buka solusaun ba polémika mate-isin Armindo Borges (47) ne’ebé daudaun iha hela Sentru Izolamentu Vera Krús.
Riak Leman hato’o lia hirak ne’e hafoin ho ekipa KKLN hala’o vizita ba hasoru lider karizmátiku, Kay Rala Xanana Gusmão, ho família matebian iha Sentru Izolamentu Vera Krús, Dili, kuarta ne’e.
Notísia Relevante : Xanana-família matebian halo limpeza iha areadór sentru izolamentu Vera Cruz
Riak Leman informa, objetivu hosi vizita ne’e atu fó solidariedade ba Xanana, tanba uluk iha tempu rezisténsia nu’udar sira-nia Komandante Em-Xefe FALINTIL no Konsellu Veteranu preokupa ho kondisaun Xanana nian ne’ebé loron-tolu no kalan-rua ona toba de’it iha estrada Sentru Izolamentu Vera Krús nia oin.
“Hanesan veteranu, ami hotu iha ai-laran, Xanana mak ami nia maun-boot, nia mak katuas liu ami, ami rona no fiar nia, agora mai terus fali hanesan ne’e halo ita-nia hanoin lakon tiha, mai toba fali hanesan ne’e. Tanba ne’e, loloos maun-boot Francisco Guterres “Lú-Olo”, Taur Matan Ruak tuur hamutuk ho Xanana atu ko’alia tanba buat mate ne’e simples ida, entrega de’it ba família di’ak liu,” Riak Leman hateten.
Nia hateten, peritu-sira iha mundu nia analiza ne’ebé haktuir mós hosi médiku balun katak kuandu pasiente pozitivu COVID-19 mate, virus ne’e mós mate no bele haloot tuir tradisaun no kumpre nafatin protokolu Organizasaun Mundiál Saúde (OMS) nian.
“Kestaun mak ita tenke komprende ba família-sira tanba iha Timor-Leste iha nia kultura rasik,” Riak Leman hateten.
Riak Leman afirma, atu solusiona mak pozisaun parte veteranu nian entrega mate-isin Armindo Borges ba família hodi haloot ka halo funerál, maibé nafatin kumpre ba protokolu saúde.
Jornalista : Nelson de Sousa
Editór : Francisco Simões
