DILI, 14 abríl 2021 (TATOLI)-–Governu liuhosi Ekipa téknika Ministériu Obra Públika (MOP) no Ajénsia Dezenvolvimentu Nasionál (ADN) kontinua identifika estragu ponte no estrada tanba inundasaun iha territóriu nasionál.
“Ami identifikasaun provizóriu estragu kauza hosi inudasaun ne’ebé akontese ho kustu millaun $200 atu halo rekuperasaun no garante kualidade. Maski identifika ona maibé seidauk hotu no sei kontinua,” Diretór Nasionál Estrada, Ponte no Kontrola Cheia, João Mário Gama de Sousa, hateten ba Agência TATOLI, kuarta ne’e.
Notísia relevante: Governu presiza millaun $200 responde dezastre naturál
Bainhira finaliza sei aprezenta ba Komisaun Administrasaun Fundu Infraestrutura (KAFI) atu deside ba tipu aprovizionamentu.
Primeiru-Ministru, Taur Matan Ruak, orienta ona ekipa atu halo asaun imediata no hadi’a estrada prinsipál hanesan iha Embaixada Japaun nia oin, mota iha RTK-dirasaun Maloa bá Tuana-laran, estrada Bidau iha Hospital Nasional Guido Valadare (HNGV) nia kotuk, estrada ligasaun Tibar bá Ermera, Ponte Loes, Ponte Bekusi-Taibesi no estrada CPLP ba tasi ibun Bebonuk.
“Ami halo etapa dahuluk ona no konsege finaliza ona dezeñu sira, nune’e iha sesta ne’e ami aprezenta ba KAFI atu halo desizaun finál atubele halo rekuperasaun,” nia akresenta.
Aleinde ne’e, Xefe Governu mós fó ona instrusaun ba Universiade Nasionál Timor-Leste (UNTL) liuhosi Departementu Enjiñeira atu fó apoia halo dezeñu no Bill of Quantity (BoQ) ba projetu estragu sira atu rekupera.
Enkuantu, estragu infraestrutura iha munisípiu sira seidauk finaliza, maibé Institutu Jestaun no Ekipamentu (IGE, sigla portugés) kontinua halo normalizasaun no halo dalan provizóriu ba estrada no ponte ne’ebé kotu atu movimentu transporte bele lao di’ak.
Nia dehan, daudaun ne’e kompañia kuaze 22 mak apoiu Governu liuhosi IGE halo normalizasaun iha kapitál Dili no terrítoriu laran.
“Ita sei haree kompañia ne’ebé hakarak halo pagamentu aprezenta hotu ba KAFI atu halo desizaun liuliu fó item serbisu ,” nia hatutan.
Jornalista: Florêncio Miranda Ximenes
Editora: Julia Chatarina
