DILI, 15 abríl 2021 (TATOLI)–VIII Governu Konstitusionál lideradu hosi Primeiru-Ministru (PM), Taur Matan Ruak, konvoka reuniaun ho membru Governu hotu atu haree estragu ne’ebé akontese hosi inundasaun iha domingu (04/04).
“Primeiru-Ministru orienta membru Governu sira foku liu ba atuasaun. Tanba ne’e, reuniaun ne’e importante atu governante sira haree filafali atuasaun ne’ebé la’o ona, planu ba oin, no konjuga ho interese país amigu ne’ebé mak hakarak apoia Timor-Leste, ne’ebé ita tenke define didi’ak intensaun saida no apoiu saida mak ita hakarak hetan hosi país amigu sira,” Portavós Governu no Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun iha salaun Ministériu Finansa, Aitarak-laran, kinta ne’e.
Iha reuniaun ne’e, governante sira asiste aprezentasaun hosi Ministériu Administrasaun Estatál (MAE) no Sekretaria Estadu Protesaun Sivíl (SEPS) kona-ba estragu tanba dezastre naturál no esforsu ne’ebé la’o iha faze emerjénsia no rekuperasaun.
Aprezentasaun SEPS foku liu ba sokoru dezde iha loron akontese dezastre naturál, esforsu atu salva sidadaun sira, esforsu hodi apoiu ai-han emerjénsia, bee-moos, aimoruk no fasilita transporte emerjénsia ba sidadaun.
Apoio fundu ba dezastre naturál ne’ebé tama ona iha Protesaun Sivíl mak hanesan Estadu Unidu Amérika $100.000, Xina $100.000, Austrália millaun $5,34, no Japaun liuhosi JICA apoia manta 5.000 no Banku ANZ kontribui $50.000.
Aleinde ne’e, iha mós ajuda nesesidade bázika hosi parseiru internasionál no nasionál, ne’ebé tama hotu iha Protesaun Sivíl no destina ba vítima dezastre naturál.
Enkuantu, iha reuniaun Konsellu Ministru, kuarta ne’e, Governu rejista ema hamutuk na’in-35 mak lakon vida durante dezastre naturál iha loron 04 abríl no na’in-10 seidauk hetan isin.
Hosi na’in-35, na’in-20 iha Dili, neen iha Ainaro, tolu iha Viqueque, rua iha Covalima, rua iha Manatuto, ida iha Aileu no na’in-ida iha Baucau.
Enkuantu ema na’in-10 maka lakon durante inundasaun, kompostu hosi na’in-haat iha Ainaro, haat iha Manatuto no rua iha Dili.
Família 25.000 resin maka hetan impaktu hosi dezastre naturál no hela fatin 4.546 maka a’at.
Nune’e mós, iha nível infraestrutura públika sira, iha estrada hamutuk 22 no ponte 11 mak hetan estragu maka’as no presiza atua urjente.
Jornalista: Antónia Gusmão
Editora: Julia Chatarina
