DILI, 15 abríl 2021 (TATOLI)–Líder Karismátiku, Kay Rala Xanana Gusmão, agradese ba ekipa Sentru Integradu no Jestaun Krize (CIGC, sigla portugés) tanba konkorda mate-isin Armindo Borgés entrega ba família.
Notísia Relevante: PM orienta CIGC ko’alia ho família hakoi mate-isin Armindo Bogres
Xanana Gusmão dezde loron 12 abríl liubá halo asaun sívika ida ba Ministériu Saúde kona-ba prosesu fúnebre mate-isin nian.
“Ami hato’o agradesimentu ba Sentru Integradu ba Jestaun Krize, tanba ami iha-ne’e loron haat no ohin ita-boot sira mai iha-ne’e,” Xanana espresa ho tanis ba ekipa SIJK ne’ebé lidera hosi Diretór Sala Situasaun-CIGC, Brigadeiru Jenerál João Miranda “Aluk”, iha sentru izolamentu Vera Krúz, kinta ne’e.
Xanana esklarese ba ekipa SIJK, katak nia parte haleu ona fatin balun hodi halo sensibilizasaun ba povu kona-ba protokolu COVID-19.
“Asaun sívika ne’e la’ós entre manán no lakon, tanba asaun ne’e la’ós kontra Governu maibé asaun sívika,” Xanana ho tanis hodi baku dala-rua eis-Xefe Governu, Rui Maria de Araújo, nia kbaas.
Tuir observasaun Agência TATOLI nian iha Vera Krús, ekipa hosi SIJK komposta hosi Brigadeiru Jenerál “Aluk”, Komodoru Pedro Klamar Fuik, dotór Rui Maria de Araújo no dotór Sérgio Lobo.
Purtantu, Xanana informa ba família matebian katak mate-isin sei rai minutu balun iha uma.
“Tau uitoan de’it hodi família lelir ka tanis maibé labele kleur, depois ba haloot ona,” nia dehan.
Xanana Gusmão informa mós ba família matebian katak hafoin haloot tenke tuir teste swab.
Jornalista : Evaristo Soares Martins
Editór : Cancio Ximenes
