DILI, 15 abríl 2021 (TATOLI)–Líder istóriku, Kay Rala Xanana Gusmão, hamutuk ho família matebian Armindo Borges, sei halo teste swab hafoin haloot mate-isin.
Durante loron haat no kalan tolu, Xanana inklui família matebian toba hein iha sentru izolamentu Vera Cruz, hodi hein ekipa forsa-tarefa Sala Situasaun-Sentru Integradu Jetaun Krize (CIGC, sigla portugés) no Ministériu Saúde (MS) entrega mate-isin ne’ebé hakotu iis iha domingu (11/04), nune’e bele haloot.
“Hafoin hakoi mate-isin, ita sira iha ne’e tenke ba tuir teste swab no atu lori mate-isin ba, ema ida labele loke kaixaun no besik,” Xanana Gusmão hameno ba família matebian no ekipa ne’ebé akompaña iha sentru izolamentu Vera Cruz, Caicoli, Dili, kinta ne’e.
Notísia relevante: PM orienta CIGC ko’alia ho família hakoi mate-isin Armindo Borges
Molok entrega mate-isin ba família hodi hakoi tuir kultura Timór, iha ona konkordánsa hosi parte família no CIGC atu nafatin tuir protokolu saúde ne’ebé estabelese hosi Organizasaun Mundiál Saúde (OMS).
“Ita nafatin tuir protokolu saúde COVID-19,” Líder karizmátiku ne’e dehan dehan.
Tuir observasaun Agência TATOLI iha terrenu, nota katak daudaun karreta funeráriu tula ona mate-isin, akompaña ho família hosi sentru izolamentu bá matebian Armindo Borges ninia rezidénsia iha Kampung Baru no bá direta iha fatin haloot iha simitériu Manleuana.
Jornalista: Florêncio Miranda Ximenes
Editora: Julia Chatarina
