DILI, 16 abríl 2021 (TATOLI) – Diretór Eskola Ensinu Báziku Sentrál (EBC) Siklu 1,2,3 Laulara, Munisípiu Aileu, Angelino Pereira, informa estudante hamutuk 500 iha eskola refere sei la tuir ezame primeira periodu tanba medida serka sanitária ne’ebé halo profesór na’in-lima hela iha Dili labele tama servisu no kompleta matéria ba estudante-sira
“Ami iha EBC Laulara agora ne’e arraska loos tanba ami nia profesór na’in-lima hela iha Dili to’o agora seidauk mai fali atu fó matéria ba estudante-sira. Ami deside ona EBC Laulara la realiza ezame primeira periodu, segunda (19/04),” Angelino Pereira informa ba Agência Tatoli liuhosi telefone, sesta ne’e.
Nia dehan, EBC Laulara la tama iha medias konfinamentu domisiliáriu, tan ne’e atividade prosesu ensinu aprendizajen iha eskola ne’e lao normál hela. Maibé matéria mak la kompletu tanba falta profesór na’in-lima ne’ebé kumpre hela serka sanitária no konfinamentu domisiliáriu iha Dili.
Angelino Pereira rasik aprezenta ona situasaun ne’e ba Diretór Servisu Edukasaun Munisípiu Aileu no parte relevante husu atu tuir prova formativu de’it katak fó sai valor de’it.
Nia dehan, eskola kontinua halo kontaktu ho profesór na’in-lima liuhosi WhatsApp, maibé matéria ne’ebé sira haruka la iha esplikasaun detallu, nune’e difisil ba estudante sira atu bele komprende.
Total profesór-sira iha EBC Siklu 1,2,3 Laulara na’in- 60, kategoria permanente 40, voluntáriu na’in-ualu (8) no kontratadu na’in-12.
Jornalista : Tomé Amado
Editór : Francisco Simões