DILI, 16 abríl 2021 (TATOLI)–Prezidente Administrasaun Aeroportu Navegasaun Aérea Timor-Leste, Empreza Públika (ANATL,E.P), José Trindade, hateten inundasaun ne’ebé akontese iha domingu (04/04) konsege estraga fasilidade aeroportu balun.
“Inundasaun foin lalais halo atendimentu hotu manuál tanba bee nakonu no estraga fasilidade hotu, maibé funsionáriu hamutuk ho parseiru sira, iha loron 06 abríl konsege hamoos no agora atendimentu aeroportu normál filafali,” Prezidente ANATL dehan iha Aeroportu Internasionál Prezidente Nicolau Lobato, Comoro, Dili, sesta ne’e.
Bee sa’e maka’as halo dokumentu barak maka a’at inklui mákina atu halo atendimentu pasajeiru iha aeroportu.
“Iha semana hirak liubá afeta hotu kedan iha laran, dokumentu sira barak maka a’at no mákina sira balun avaria,” nia akresenta.
Nia dehan, mákina balun ne’ebé avaria, daudaun iha hela manutensaun nia laran.
“Mákina x-ray balun ne’ebé a’at, agora iha hela manutensaun nia laran, balun di’ak ona no halo fali atendimentu normál,” nia hatutan.
Jornalista: Natalino Costa
Editora: Julia Chatarina
