LIQUIÇA, 18 abríl 2021 (TATOLI)—Família 100-resin ne’ebé hela iha área Loes Suku Vatuboro, Postu Administrativu Maubara, Munisipiu Liquiça, la asesu eletrisidade durante semana rua ona, desde dezastre naturál iha 04 abríl, tinan ne’e.
Abitante, Laurindo Sarmento Mendonça, hateten maski la asesu eletrisidade durante semana rua, maibé ida-ne’e la’ós kulpa parte Eletrisidade Timor Leste (EDTL) nian, maibé tanba dezastre naturál mak estraga hotu ai-rin no fiu lubuk ida.
Notísia relevante:MSSI Liquiça submete dadus vítima inundasaun ba nasionál
“Hahú kedan iha 4 abríl bainhira udan boot halo rin eletrisidade barak mak monu, entaun ami-nia ahi la lakan to’o agora. To’o oras ne’e parte EDTL seidauk mai haree,” Laurindo hateten ba jornalista Agênia Tatoli iha Loes, domingu ne’e.
Nia dehan, impaktu hosi avariasaun eletrisidade ne’e, komunidade labele asesu mós bee moos tanba maioria komunidade uza sanho.
“Problema ida mak, ami labele hetan bee moos, tanba ahi lakan mak bee bele mai no durante semana rua komunidade kuru iha mota,” nia subliña.
Kona-bá situasaun ne’e, Koordenadór EDTL Munisípiu Liquiça, Júlio Jorse Urbano da Silva Ximenes Nunes, rekoñese duni katak, to’o oras ne’e komunidade iha área ne’e seidauk asesu ba eletrisidade, tanba parte EDTL seidauk hadi’a, desde dezastre naturál iha semana rua liu-bá.
“Los duni ita seidauk hadi’a tanba bee lori tiha ita-nia Poste 3 pool ne’ebé monu hotu, entaun presija tempu atu normaliza fila-fali. Ita presiza kamioneta atu mai fó apoiu, maibé kamioneta ne’e sei uza hela iha Dili, no ita presija atu pasiénsia oitoan hodi hein,” nia husu pasiénsia komunidade.
Júlio Jorse Urbano da Silva Ximenes Nunes sei tenta nafatin ba EDTL nasionál, hodi bele apoia kamioneta, nune’e segunda ba oin bele hala’o ona normalizasaun ba ahi ne’ebé mate.
Ekipa téknika EDTL Liquiça mós halo ona levantamentu no mós halo ona akizasaun materiál, maibé hein de’it transporte atu tula materiál hirak-ne’e.
Entretantu, materiál ne’ebé presija hosi nasionál tanba bee lori hotu mak hanesan HT pool cross A3, Poste A2 ida tohar, fiu hamutuk metru 170 ho unidade milimetru 70.
Jornalista: Hortencio Sanchez
Editór: Cipriano Colo
