DILI, 19 abríl 2021 (TATOLI)—Sala Situasaun Sentru Integradu Jestaun Krize (SIJK) anunsia kazu pozitivu foun hamutuk 62, ne’ebé detetadu iha Dili na’in 60 no na’in-rua iha Munisípiu seluk. Ohin mós iha kazu rekoperadu na’in 30 no kazu ativu hamutuk 673.
“Hosi totál kazu detetadu foun iha mane 39, feto 23, asintomátiku 59 (95%), sintomátiku na’in-tolu. Rekoperadu na’in 30 no totál kazu ativu 673,” Koordenadór Forsa-Tarefa ba Prevensaun no Mitigasaun, Rui Maria de Araújo, hato’o liu hosi konferénsia imprensa iha Centro Convenções Dili (CCD), segunda ne’e.
Notísia relevante:COVID-19: kazu foun 70, rekoperadu 21, ativu 641
Kazu detetadu foun ohin, 43 (69,3%) mak deteta tanba halo teste ho razaun atu halo viajen ka halo ona viajen ba Munisípiu, hafoin deteta pozitivu.
Maski nune’e, sira ne’ebé rezultadu teste pozitivu, sira-nia hela fatin, iha Dili, iha duni cluster sira ne’ebé iha kazu detetadu barak. Nune’e, totál kazu konfirmadu kumulativu sura hosi 21 marsu 2020 hamutuk 1.368.
Hosi horisehik mai ohin, hamutuk hotu Laboratóriu Nasionál Saúde halo testes PCR 535, ho detalla hanesan tuir mai, Vijilánsia sentinela neen, Rastreiu ba kontaktu ka Contact tracing 102, Rastreiu Aleatóriu ka Random Screening 179, Viajen sai hosi serka sanitária Munisípiu Dili 245 no Viajen internasionál tolu.
Informasaun adisionál hosi SIJK katak, iha izolamentu Vera Cruz iha kazu detetadu na’in ualu. Iha área obstetrisia na’in-tolu, medisina interna na’in-lima. Sira na’in-tolu iha obstetrisia, ida partu normál bebé ida, ida partu oan-kaduak, ida fali ho istória cesariana, sei hein atu partu. Sira na’in-tolu kategoria moderadu hotu no kondidaun bebé na’in-tolu, estável.
Kona-bá sira na’in-lima iha medisina interna, ida grave, na’in-haat moderadu, no kazu grave nafatin uza ventiladór ho ai-moruk balun tuir protokolu ne’ebé Timor-Leste adopta.
SIJK apela ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona atu prevene moras COVID-19 da’et ba mai.
Regra sira-ne’e, hanesan mak hanesan Uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.
Jornalista: Felicidade Ximenes
Editór: Cipriano Colo
