DILI, 19 abríl 2021 (TATOLI)—Funsionáriu sira iha Parlamentu Nasionál no deputadu balun, segunda ne’e, hahú simu ona vasina AstraZeneca hosi Ministériu Saúde (MS).
Responsável vasina iha Parlamentu Nasionál, Dulce Pinto Tilman, no ekipa médiku sira molok simu imunizasaun esplika esperiénsia ne’ebé sira hetan hafoin simu vasinasaun.
Dulce Pinto Tilman informa, hafoin programa vasinasaun ne’e lansa no to’o oras ne’e ema ne’ebé vasina ne’e hamutuk 8.832.
“Ninia efeitu mak depois vasina iha loron ida ka rua sei mosu isin-manas, ulun moras uitoan, ita sente isin kole uitoan, atu kona bee-doko. Ne’e reasaun ida-ne’ebé mak normál. Ne’e hatudu katak imunidade natureza iha ita-nia isin, simu ona imunidade ne’ebé mak halo (buatan), sira na’in-rua kontra malu oinsá adapta atubele simu malu iha ita-nia sélula,” Dulce Pinto Tilman, esplika ba funsionáriu Parlamentu Nasionál sira iha uma fukun.
Bainhira mosu reasaun entaun bele konsumu Paracetamol 3×1, tanba ne’e presiza hemu bee barak, han ai-fuan no modo tahan, nune’e reasaun sira-ne’e lakon rasik de’it. Reasaun ne’e la’ós ba ema hotu-hotu maibé depende ba imunidade ema ida-idak nian.
“Iha balun la hatudu reasaun ida, só nafatin sente moras, ne’e normál. Tanba ne’e mak lalika ta’uk, tanba ami sira-ne’e simu tiha ona vasina. Se mate karik, ami mate tiha ona,” nia dehan.
Tuir observasaun Agência TATOLI iha implementasaun programa vasina iha Parlamentu Nasionál, koko uluk tensaun hafoin tama ba simu vasina.
Nune’e mós, ema ne’ebé simu vasina ne’e sei halo observasaun hosi médiku sira katak karik mosu reasaun ruma, maibé situasaun atuál oras ne’e iha PN laiha ema ida mak mosu reasaun no fila ba uma hodi deskansa.
Purtantu deputadu sira-ne’ebé simu vasina mak hanesan Francisco Miranda Branco, António da Conceição no Dário Madeira.
Jornalista: Evaristo Soares Martins
Editór: Cancio Ximenes
