DILI, 20 abríl 2021 (TATOLI)—Primeiru-Ministru (PM), Taur Matan Ruak, akompaña hosi Ministru Obra Públika, Salvador Eugênio Soares dos Reis Pires, hamutuk ho entidade relevante sira halo observasaun ba servisu emerjénsia rekupera estrada ne’ebé kotu iha Embaixada Japaun nia oin, iha Praia dos Coqueiros.
“Kompañia Montana Diak halo rekonstrusaun bazeia ba desizaun Konsellu Administrasaun Fundu Infraestrutura (KAFI) no haree ba kapasidade finaseiru no tékniku, kompañia iha kondisaun atu rekupera emerjénsia tanba ida-ne’e estrada protokulu ba movimentasaun transporte,” Ministru Salvador hateten hafoin observa atividade kompañia, tersa kalan ne’e.
Notísia relevante: Governu indika Montana Diak hahú rekupera estrada Embaixada Japaun oin
Kustu ba projetu ne’e hamutuk $314.000 ho durasaun fulan ida hahú abríl to’o maiu tinan ne’e.
Governante ne’e dehan, tékniku Ministériu Obra Públika (MOP) mak sei akompaña kompañia hasai uluk sedimentasaun, hafoin aterru fatuk no rai hodi nahe alkatraun.
“Kompañia sei aterru fatuk no rai hafoin nahe alkatraun no sei konstrui mós barreira atu satan tasi bee, projetu ne’e emerjénsia tanba ne’e lais di’ak liu. Espera loron tolu ka haat transporte públiku bele la’o normál,” nia akresenta.
Bazeia ba despaisu Primeiru-Ministru, forma ekipa Task Force hodi halo identifikasaun no kuantifikasaun ba estragu infraestrutura iha kapitál Dili no munisípiu sira kauza hosi dezastre naturál ne’ebé akontese iha domingu (04/04).
Ekipa ne’e halo verifikasaun ba estragu sira inklui estrada monu iha Embaixada Japaun oin, no nota katak estrada protokolu ne’e presiza halo rekonstrusaun emerjénsia hodi fasilita movimentasaun transporte no komunidade iha área refere.
Nune’e, ekipa Task Force ne’ebé kompostu hosi MOP no Ajénsia Dezenvolvimentu Nasionál (ADN) prepara estudu no dezeñu, inklui delibera ona iha KAFI, iha loron 19 abríl.
Jornalista: Florêncio Miranda Ximenes
Editora: Julia Chatarina
