DILI, 20 abríl 2021 (TATOLI)—Autoridade hosi Sala Situasaun Sentru Integradu Jestaun Krize (SIJK), hamutuk ho família matebian Francisca Gama, hala’o serimónia kulturál hodi harii Cruz, tau ai-funan no sunu lilin ba rate iha Metinaro, Munisípiu Dili.
Molok, harii Cruz, tau ai-funan no sunu lilin, atributu kulturál hirak-ne’e hetan uluk bensaun hosi reitór Semináriu Menór Nossa Senhora de Fátima, Balide, Padre Angelo Salsinha.
Notísia relevante:PM Taur husu deskulpa ba família kazu óbitu COVID-19 dahuluk
Koordenadór Estadu-Maiór Sala Situasaun-SIJK, Komodoro, Donaciano Costa Gomes ‘Pedro Klamar Fuik’ husu deskulpa ba família, tanba erru ne’ebé komete iha pasadu no konsidera ida-ne’e hanesan lisaun ida atu bele apreende iha futuru.
”Ha’u lori naran Sentru Integradu Jestaun Krize husu deskulpa ba família matebian. Ami sala ona, ita hotu buka aprende hosi ita-nia sala,” Pedro Klamar Fuik hateten iha semitériu COVID-19, Metinaro, tersa ne’e.
Nia dehan, ho serimónia kulturál ida-ne’e liuliu harii Crúz, hamutuk fó ondra fila-fali no dignifika matebian iha fatin ida-ne’e.
Nune’e mós família matebian, Francisco Ximenes, hateten família simu realidade ida-ne’e ho liman rua, maski simu ho matan-been.
“Ami fiar médiku-sira katak, Francisca Gama mate ho COVID-19. Tanba ne’e, ami família hakruuk ba desizaun Governu,” nia hateten.
Francisco Ximenes reprezenta família husu deskulpa ba Governu liu-liu SIJK ba lia-fuan naksalak ruma hosi família ne’ebé espresa iha média sosiál, familia husu deskulpa.
Iha serimónia kulturál ida-ne’e partisipa hosi Diretora Jerál Prestasaun Serbisu Saúde, Odete Viegas no relijiozu-sira.
Entretantu, Francisca Gama (44) nu’udár timor-oan dahuluk ne’ebé hakotu iis iha tersa (06/04) dadeer iha sala izolamentu Ospitál Lahane ho COVID-19, hakoi iha semitériu ne’ebé lokaliza iha postu administrativu Metinaro, munisípiu Dili.
Jornlista: Felicidade Ximenes
Editór: Cipriano Colo
