DILI, 21 abríl 2021 (TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19 foun hamutuk 57, rekoperadu 33 no totál ativu 749.
“Totál kazu konfirmadu kumulativu sura hosi 21 marsu hamutuk 1.509. Kazu foun 57 kompostu hosi Munisípiu Dili 53 no Munisípiu seluk haat,’’ Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten via komunikadu, kuarta ne’e.
Notísia relevante:COVID-19: kazu foun 84, ativu 725
Totál kazu foun ohin mane 34, feto 23, sintomátiku lima, asintomátiku 52 (91,2%). Hosi kazu hirak-ne’e, na’in 50 (87,7% )mak detetadu ho razaun atu viajen ba Munisípiu, hafoin deteta pozitivu. Sira-nia hela fatin iha Dili, iha duni cluster-sira ne’ebé iha kazu detetadu barak.
Hosi horisehik mai ohin, hamutuk hotu Laboratóriu Nasionál Saúde halo testes PCR 832, ho detalla hanesan tuir mai, Vijilánsia sentinela 42, Rastreiu ba kontaktu ka Contact tracing 32, Rastreiu Aleatóriu ka Random Screening 336, Viajen sai hosi serka sanitária Munisípiu Dili 397, Viajen internasionál 25.
Informasaun adisionál iha loron 21 abríl 2021, izolamentu Vera Cruz iha kazu detetadu na’in 13. Iha área obstetrisia na’in-tolu, medisina interna na’in-sia, pediatria na’in-ida.
Sira na’in-tolu iha obstetrisia, kategoria moderadu hotu, na’in rua tu’ur-ahi ona, ida sei hein. Sira hotu-nia kondisaun estável.
Sira na’in-sia iha medisina interna, haat grave, lima moderadu. Na’in haat grave, ida uza ventiladór, na’in-tolu uza CPAP (Continuous Positive Airway Pressure). Kazu ida pediatria, fulan 5 ho boncopneumonia moderadu, nia kondisaun estável.
SIJK apela ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona atu prevene moras COVID-19 da’et ba mai.
Regra sira ne’e, mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu evita halibur-malu barak hamri’ik ka tur do’ok hosi ema seluk, mínimu metru ida ho balun.
Jornalista: Felicidade Ximenes
Editór: Cipriano Colo
