DILI, 21 abríl 2021 (TATOLI)-Fundasaun Hadomi Timor (FHT), kuarta ne’e, distribui nesesidade báziku ba estudante-sira ne’ebé hela aluga uma ka “kost” no afetadu ba dezastre naturál, foin lalais ne’e.
“Ami halibur estudante-sira, distribui nesesidade báziku uitoan ba sira atu hakmaan ita-nia terus durante serka sanitária, inklui dezastre naturál,” diretór ezekutivu Fundasaun Hadomi Timor, Abrão Moneiro, informa ba Jornalista sira hafoin distribui nesesidade báziku ba estudante-sira iha Sede Luta Hamutuk, Farol, Dili.
Fundasaun Hadomi Timor sente iha kbiit uitoan koopera ho sira ne’ebé iha kbi’it barak liu hamutuk hodi fó apoiu ba maluk sira ne’ebé susar tebes iha situasaun kalamidade ne’e.
Apoiu nesesidade báziku ne’ebé Fundasaun Hadomi Timor distribui ba estudante-sira mak hanesan, foos, mina han, supermi, bikan, kanuru, kopu no seluk tan.
Nia hatutan, ba futuru NGO Fundasaun Hadomi Timor kontinua buka dalan hodi bele fasilita maluk sira ne’ebé mak presiza apoiu, hanesan matadalan ida oinsá atu halo komunikasaun entre komunidade ne’ebé mak presiza apoiu.
Apoiu nesesidade báziku ne’ebé fahe ba estudante-sira nu’udar mós kontirubisaun hosi parseiru sira, hanesan Portuguese Timorese Sosiál Clap Darwin liuhosi Perissos.
Benefisiáriu Abilio Amaral da Costa, ne’ebé daudaun hala’o nia estudu iha Universidade Nasionál Timor Lorosa’e (UNTL) hato’o agradese ba NGO Fundasaun Hadomi Timor tanba iha situasaun serka sanitária no inundasaun bele hetan apoiu emerjénsia hosi FHT.
“Antes ne’e ami iha ona balun hosi Governu inklui organizasaun balun, maibé hahán ami simu rahun entaun bainhira konsumu sente hahán la to’o,” Abilio Amaral da Costa hateten.
Jornalista : Arminda Fonseca
Editór : Francisco Simões
