DILI, 21 abríl 2021 (TATOLI) – Governu Austrália ho kompañia petróleu Santos apoiu elikópteru ida ba Timor-Leste, nune’e parte ezekutivu bele utiliza durante fulan ida hodi transporta apoiu umanitáriu ba populasaun iha área remota.
Elikópteru, oras ne’e iha ona aeroportu internasionál Prezidente Nicolau Lobato, Komoro ho pilotu na’in-tolu hosi kompañia aviasaun MCDERMOTT no kapasidade aviaun ne’e bele tula ema na’in-ualu no sasán tonelada ida ne’ebé bele tara de’it.
Notísia relevante:Austrália apoia materiál emerjénsia tonelada 27-resin ba TL
Vise-Ministru Interiór, António Armindo, hateten prosesu ne’e negosia hosi Governu TL, maibé hetan apoiu osan hosi Governu Austrália no kompañia Santos ho orsamentu $921.782.
“Lori Governu Timor-Leste hakarak agradese ba Governu Austrália no empreza Santos ho parseiru-sira ne’ebé oferese elikópteru ba fulan ida atu mobiliza ajudu umanitáriu ba área remota, hanesan ai-moruk no mós ai-han, liuliu ba fatin ne’ebé difísil asesu ba estrada”, António Armindo hateten iha aeroportu, kuarta ne’e.
Ministéiru Interiór mak sei koordena ho ministéiru-sira atu utiliza aviaun ne’e hodi hala’o serbisu umanitáriu, nune’e bele atende populasaun iha territóriu.
Embaixadór Austrália iha TL, Petter Robert, hateten apoiu ne’e pakote adisionál ba asisténsia dólar Austrália millaun $7, ne’ebé Governu Austrália oferese ba TL hodi hatán ba COVID-19 no dezastre naturál.
“Governu Austrália ho kompañia Santos fó apoiu hodi finansia elikópteru ida ne’e, espera bele utiliza iha área oioin depende ba nesesidade”, nia dehan.
Elikópteru ne’ebé aluga, sei halo operasaun durante fulan ida, to’o maiu nia rohan, maibé iha nesesidade atu prolonga Governu Austrália prontu fó apoiu nafatin.
Nune’e mós Diretór kompañia Santos, José Lobato, hateten iha aprosimasaun hosi Governu, husu kompañia ne’e atu bele ajuda elikópteru ida, hodi responde situasaun inundasaun.
“Nune’e ami halo esforsu buka elikópteru iha Austrália hodi mai Timor-Leste, maibé halo mós kontribuisaun ba kustu aluga elikópteru hamutuk $250.000 no restu hosi Governu Austrália”, nia dehan.
Tuir observasaun, elikópteru hosi kompañia aviasaun MCDERMOTT Austrália ho númeru N365JA estadia iha aeroportu Komoro.
Tuir dadus provisóriu hosi Sekretariu Estadu Protesaun Sivil, inundasaun ne’ebé akontese hamate ona ema 35; Dili ema 20, nain neen hosi Ainaru, nain tolu hosi Vikeke, Kovalima no Manatutu ema nain rua, Baukau no Aileu ema nain ida. Ema nain 10 mak sei lakon iha Ainaru, nain haat hosi Manatutu no rua hosi Dili.
Inundasaun ne’e afeta mos família kuaze 25 mil, uma 4.546 mak hetan estraga iha teritóriu Timor-nian.
Infraestrutura públika ne’ebé hetan estraga mak; estrada 22, ponte 11. Ema kuaze 11.104 iha Dili mak buka fatin seguru iha fatin refujiadu 38.
Notísia relevante: Austrália iha kompromisu apoia millaun AU$7 ba Timor-Leste
Jornalista : Nelson de Sousa
Editór : Cipriano Colo
