DILI, 21 abríl 2021 (TATOLI)—Sekretária Estadu Protesaun Sivíl (SEPS) oferese ona apoiu emerjénsia ba família hamutuk 5.323 iha Munisípiu Dili, ne’ebé afetadu ba dezastre naturál iha 04 abríl.
Apoiu ne’ebé SEPS oferese mak hanesan foos, mina bimoli, susu-been, biskuit, ikan-lata, sasán kuziña no seluk-tan.
Notísia relevante: SEPS sei transporta apoiu emerjénsia ba Ataúro ho elikópteru
“Dadus ne’ebé identifika iha Dili, númeru família agora sa’e ba 9.000 atu hetan apoiu emerjénsia. Hosi númeru ne’e, to’o 19 abríl iha família 5.323 mak simu ona apoiu no ita kontinua distribui ba sira-ne’ebé seidauk hetan,” SEPS, Joaquim Gusmão, hateten ba jornalista Agência Tatoli iha Aeroportu Comoro, kuarta ne’e.
SEPS mós re-aloka apoiu emerjénsia hosi nasionál ba Munisípiu-sira ne’ebé estok menus, hodi bele distribui ba família afetadu-sira.
Tuir dadus ofisiál hosi Governu liu hosi Ministériu Administrasaun Estatál (MAE), provizoriamente iha família 25.207 mak afetadu ba inundasaun iha territóriu.
Ekipa MAE, SEPS no seluk tan kontinua hala’o levantamentu hodi identifika kategoria estragu natón, kamán no aat totál, atu bele hetan apoiu rekoperasaun hosi Governu.
Jornalista: Nelson de Sousa
Editór: Cipriano Colo
