DILI, 23 abríl 2021 (TATOLI)—Família hamutuk 32 nu’udár vítima dezastre naturál iha 04 abríl, ne’ebé refujia iha Komunidade Sagrado Coração de Jesus Hera, ohin fila ona ba ida-idak nia hela fatin.
Serimónia reintegrasaun ne’e realiza tanba Sekretária Estadu Protesaun Sivíl (SEPS), Diresaun Nasionál Prevensaun Konflitu Komunitáriu (DNPKK) no Diresaun Nasionál Risku Dezastre Naturál (DNRDN), serbisu hamutuk ho Plan International.
Notísia relevante:SEPS apoia ona família 5.323 iha Dili
Diretór Nasionál SEPS, Superintendente Polísia, Ismael da Costa Babo, hateten vítima balun fila fali ba sira-nia uma, tanba sira-nia uma ladún hetan estragu.
“Dadus ne’ebé amu fó ne’e, iha uma-ka’in 70-resin. Maibé, iha uma-ka’in 32, liu hosi diálogu ita esplika kona-bá kondisaun reál ne’ebé akontese durante dezastre naturál. Ita husu ba sira atu bele fila-fali ba sira-nia fatin,” Ismael da Costa Babo, hateten ba jornalista-sira iha Hera, sesta ne’e.
Prosesu reintegrasaun ba vitima sira-ne’e, DNJRD fasilita hodi fó apoiu sasán nesesidade bázika no ba sira ne’ebé uma hetan estragu totál, Governu sei rekolla dadus atu buka apoiu materiál konstrusaun.
“Ita-nia ekipa sei tun halo verifikasaun ba estragu sira-ne’e, depois sei apoia rekoperasaun ba sira iha tempu tuir-mai,” nia hateten.
Iha fatin hanesan, Koordenadór Jerál Komunidade Sagrado Coração de Jesus Hera, Padre Nívio Correia Lebre, hateten hahú hosi prosesu evakuasaun, akomoda família 72, ho totál ema 585 mai hosi Bairru Kampung Baru no Bedik, aldeia Ailok Laran, Suku Hera, Postu Administrativu Cristo Rei, Munisipiu Dili.
Oras ne’e daudaun, iha família 40 mak seidauk bele fila ba sira-nia uma, tanba kondisaun uma mota sobu totál.
Padre Nívio hatutan, vítima sira-ne’e deside seidauk bele fila ba sira-nia uma hodi hein Governu fó apoiu materiál konstrusaun atu bele konstrui hikas sira-nia uma.
Vítima, Casilda Guterres agradese ba Padre-sira ne’ebé laran di’ak hodi simu sira atu bele hela provizóriu, to’o fila ba sira-nia uma.
Nia espresa mós sentimentu triste, tanba inundasaun ne’ebé akontese halo mota lori hotu sira-nia sasán uma laran, no espera Governu sei apoia materiál konstrusaun hodi rekopera kondisaun ne’e.
Jornalista: Eugénio Pereira
Editór: Cipriano Colo
