DILI, 23 abríl 2021 (TATOLI)—Dadus hosi Sala Situasaun Sentru Integradu Jestaun Krize (SIJK) hatudu katak, prevalénsia surtu COVID-19, iha Timor Leste (TL), iha semana ida ikus, kompara ho semana rua liu-bá, Munisípiu Dili aumenta ba beibeik, no hatudu katak ema barak liu tan mak infetadu.
Hosi dadus ne’e, faktu hatudu, maioria hosi ema ne’ebé detetadu pozitivu mak la hatudu síntomas no ema ne’e rasik la hatene katak, nia moras hela.
Notísia relevante:COVID-19: kazu foun 82 no ativu 925
“Signifika, SARS-CoV-2, da’et makaas ba mai iha populasaun Dili nia leet,” Koordenadór Forsa-Tarefa ba Prevensaun no Mitigasaun surtu COVID-19, Rui Maria de Araújo hateten via komunikadu, sesta ne’e.
Rui Maria de Araújo esplika, atu bele hatene surtu ida-ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia-nian uza, maka prevalénsia.
Konvensionalmente, nia dehan, prevalénsia sukat persentajen ema ne’ebé detetadu hetan moras ida iha populasaun-nia le’et, iha periúdu tempu ne’ebé determinadu.
Nune’e, ekipa konjunta saúde buka determina prevalénsia ema ne’ebé detetadu COVID-19 iha Munisípiu Dili, no hetan rezultadu hanesan tuir mai, entre 2 abríl ho 15 abríl 2021 (semana 2), prevalénsia 3,5%, pozitivu na’in 264 hosi ema na’in 7.564 ne’ebé halo teste rastreiu aleatóriu no rastreiu atu halo viajen sai hosi serka sanitária Munisípiu Dili.
Entre 16 abríl ho 22 abríl 2021 (semana ida), prevalénsia 7.3%, pozitivu hamutuk na’in 425 hosi ema na’in 5.799 ne’ebé halo teste rastreiu aleatóriu no rastreiu atu halo viajen sai hosi serka sanitária Munisípiu Dili.
Entretantu, ohin, Sala Situasaun Sentru Integradu Jestaun Krize, rejista kazu pozitivu foun hamutuk 82, no kazu ativu 925. Hosi totál detetadu 82 ne’e, na’in 72 iha Dili, Munisípiu seluk 10, signifika, Dili barak liu.
Jornalista: Felicidade Ximenes
Editór: Cipriano Colo
