DILI, 26 abríl 2021 (TATOLI)—Sekretária Estadu Protesaun Sivíl (SEPS) simu ona apoiu umanitáriu hanesan nesesidade bázika hosi entidade hamutuk 47, no distribui ba iha família afetada dezastre naturál iha 04 abríl.
“To’o ohin iha entidade 47 ne’ebé fó apoiu sasán nesesidade bázika hanesan hahán no la’ós hahán, liu hosi parte protesaun sivíl. Apoiu sira-ne’e tama direta iha Sentru Operasaun Protesaun Sivíl ne’ebé tau pakote hamutuk ho sasán sira ne’ebé SEPS iha, hafoin distribui fila-fali ba família afetadu no sentru evakuasaun-sira,” SEPS, Joaquim Gusmão hateten ba jornalista Agência Tatoli iha kna’ar fatin Caicoli, Dili, segunda ne’e.
Notísia relevante:Família 6.000 iha Dili hetan ona apoiu emerjénsia hosi SEPS
Maski la temi naran entidade detalladamente maibé, Joaquim Gusmão dehan, entidade hirak ne’e kompostu hosi asosiasaun privadu, públiku, parseiru nasionál no internasionál, embaxada, emprezáriu, individuál no sira seluk-tan.
Nesesidade emerjénsia ne’ebé entidade-sira oferese mak hanesan foos, mina bimoli, susu-been, ikan lata sardina, biskuit, super mie, sabaun, sasán kuziña ho sira-seluk.
SEPS mós rejita hela apoiu fundu ba dezastre naturál ne’ebé tama ona iha Protesaun Sivíl mak hanesan Estadu Unidu Amérika (EUA) hamutuk $100.000, Xina $100.000, Austrália millaun $5,34, no Japaun liu hosi JICA apoia manta 5.000, Banku ANZ kontribui $50.000, Thailándia $2.500, Korea do Súl $100.000.00, Empreza Petrolífeira Santos dolár Australianu rihun $250.
“Fundu sira-ne’e barak la direita ba SEPS, ezemplu Amérika-nian direita hosi IOM, Koreia Súl direta ba UNDP, Santos direta ba CVTL mak jere halo koordenasaun direta ho protesaun sivíl hodi sosa nesesidade bázika,” Joaquim Gusmão subliña.
Nia dehan, úniku fundu hosi Xina no Thailándia nian mak direta ba protesaun sivíl, hodi utiliza ba nesesidade operasionál nian.
Tanba ne’e, Governante ne’e lori Governu-nia naran agradese ba apoiu hotu hosi parseiru-sira iha situasaun kalamidade.
Tuir dadus SEPS, to’o ohin, konsege fó ona apoiu emerjénsia ba família 6.000 iha Munisípiu Dili, ne’ebé afetadu ba dezastre naturál.
Jornalista: Nelson de Sousa
Editór: Cipriano Colo
