DILI, 26 abríl 2021 (TATOLI)—Tuir dadus hosi Sekretária Estadu Protesaun Sivíl (SEPS) ho Ministériu Administrasaun Estatál (MAE), to’o oras ne’e sei iha família hamutuk 834 mak kontinua hela iha sentru evakuasaun hitu, iha Munisípiu Dili.
“Iha família 834 ho númeru populasaun 4.356 mak kontinua hela iha sentru evakuasaun boot hitu iha Dili,” SEPS, Joaquim Gusmão hateten ba jornalista Agência Tatoli iha knaar fatin Caicoli, Dili, segunda ne’e.
Notísia relevante:Família 6.000 iha Dili hetan ona apoiu emerjénsia hosi SEPS
SEPS koordena ona ho dirijente-sira iha kada fatin evakuasaun atu identifika loloos kona-bá família afetada-sira ne’ebé balun kondisaun uma di’ak hela bele reintegra hikas, no sira ne’ebé uma estragu totál bele kontinua hela provizóriu.
“Ita halo aprosimasaun ho família ne’ebé sira-nia uma kondisaun di’ak oituan bele fila ona no sira-ne’ebé estragu totál atu kontinua hela provizóriu iha fatin evakuasaun-sira,” nia esplika.
Ministériu Administrasaun Estatál (MAE) ho liña ministeriál ne’ebé iha hela terrenu, kontinua halo levantamentu uza formatu multisetorál ba família afetada-sira atu prienxe hodi deklara loloos kona-bá uma ne’ebé estragu ho kategoria aat natón, kamán no aat totál.
Bainhira finaliza levantamentu ne’e, SEPS bele fó ona apoiu rekoperasaun hanesan materiál konstrusaun no osan maun de obra ba vítima-sira atu bele hadia hikas uma ne’ebé hetan estragu.
“Maibé ba sira ne’ebé hela iha área risku hanesan mota ninin, foho lolon no iha Lagoa Tasi-tolu atu prevene dezaste iha tempu tuir-mai, maka ita hanoin atu sira labele fila-fali hodi hela iha fatin sira-ne’e,” nia esklarese.
Entretantu, fatin evakuasaun ativu hitu ne’ebé família afetada-sira okupa mak hanesan, salaun Don Bosco Comoro, Fatin rua iha Tasi-tolu ho fatin evakuasaun tolu seluk.
Jornalista: Nelson de Sousa
Editór: Cipriano Colo
