DILI, 26 abríl 2021 (TATOLI)-–Maski implementasaun programa Cesta Bázika kuaze konklui ona, maibé komunidade iha fatin balun seidauk benefisia, hanesan mós komunidade iha postu Administrativu Laleia, Munisípiu Manatuto.
Administradór postu Laleia, Simião da Costa, hateten, antes ne’e autoridade simu kalendáriu hosi ekipa distribuisaun Cesta Bázika katak sei hahú implementa iha 2020 nia rohan.
“Komunidade iha ne’e to’o agora seidauk simu produtu, tuir kalendáriu ne’ebé simu, distribuisaun sei realiza iha novembru no inísiu dezembru 2020, maibé realidade seidauk realiza,” Administradór postu Laleia relata ba Agência TATOLI, via telefónika, segunda ne’e.
Autoridade ne’e konfesa, to’o agora seidauk simu fali informasaun formál ruma bainhira mak hahú distribuisaun iha Laleia.
“Atu distribui fali bainhira ha’u seidauk hetan informasaun, tanba distribuisaun ne’e mai hosi nasionál, enkuantu ami asegura de’it prosesu ne’e iha baze,” nia akresenta.
Nia konsidera, programa ne’e ba povu iha territóriu tomak, tanba ne’e labele iha ema ida mak eskluidu.
Enkuantu, antes ne’e tuir kalkulasaun, kustu implementasaun programa Cesta Bázika hamutuk millaun $71, ne’ebé ekivalente ho totál populasaun hamutuk millaun 1,3, maibé hafoin simu lista atuál hosi Ministériu Administrasaun Estatál, totál populasaun sa’e ba millaun 1,5 ne’ebé orsamentu ba programa ne’e sai millaun $82.
Jornalista: Antónia Gusmão
Editora: Julia Chatarina
