DILI, 26 abríl 2021 (TATOLI)—Komandu Polísia Nasionál Timor-Leste (PNTL), liu hosi Departamentu Polísia Komunitária (POLKOM) Munisípiu Dili, kontinua halo sensibilizasaun ba komunidade atu prevene transmisaun COVID-19, iha Dili.
Xefe Departamentu Polísia Komunitária, Superintendente Polísia, António da Luz, informa sensibilizasaun ne’e hala’o tanba implementa orden diretiva operasaun hosi Komandu Jerál PNTL, hodi asegura regra serka sanitária ne’ebé Ministériu Saúde (MS) no Organizasaun Mundiál Saúde (OMS) fó sai ona.
Notísia relevante:PNTL detein abitante 79 ne’ebé dezvia hosi Dili atu ba munisípiu
“Ami halo sensibilizasaun hamutuk ho POLKOM Munisípiu Dili, deteta komunidade balun la uza máskra. Ami mós prepara kedan máskara ba sira ne’ebé la uza,” Superintendente Polísia, António hateten ba jornalista-sira, iha Dili, segunda ne’e.
Durante sensibilizasaun ne’ebé hala’o tama sai loza, ofisina, merkadu iha Dili, polísia husu atu komunidade uza nafatin máskara bainhira halo komunikasaun no fase-liman bebeik ho bee moos.
Nune’e mós Segundu Komandante PNTL Munisípiu Dili, Superintendente Polísia, Euclides Belo, husu komunidade iha Dili atu mantein uza máskra no fase liman ho sabaun inklui kumpri nafatin regra sira.
“Hato’o ba komunidade katak, moras ne’e eziste duni, no iha mundu akontese ema mate barak los,” Euclides alerta.
Tuir planu, programa sensibilizasaun ne’e, PNTL sei kontinua hala’o hodi tama sai bairru-sira iha kapitál Dili.
Jornalista: Eugénio Pereira
Editór: Cipriano Colo
