DILI, 26 abríl 2021 (TATOLI)—Sala Situasaun Sentru Integradu Jestaun Krize (SIJK), fó-sai ona katak, Timor-Leste (TL) tama ona iha transmisaun komunitária, liuliu iha Munisípiu Dili ne’ebé kazu pozitivu aumenta hosi loron ba loron, nune’e Ministra Saúde (MS), Odete Maria Freitas Belo apela ba sidadaun hotu atu kontribui ba prevensaun COVID-19.
“Minsitériu Saúde nia preparasaun, ami prepara antes ona no hateten ona ba komunidade katak, ita-nia rekursu limitadu. Bainhira ita-nia rekursu limitadu, entaun sidadaun ida-idak nia kontribuisaun ba nasaun ne’e importante no simples mak hanesan uza másker, fase liman bebeik, labele iha agrupamentu no halo distansiamentu sosiál. Maibé, agora ita haree kazu aumenta ba bebeik no ita ida-idak prevene an deit ona,’’ Odete Belo hateten ba jornalista-sira, iha Aeroportu Comoro, segunda ne’e.
Notísia relevante:COVID-19: tuir klasifikasaun OMS, Dili hahú tama transmisaun komunitária
Nia dehan, kualkér informasaun ne’ebé sai hosi SIJK no Minitériu Saúde sempre bazeia ba dadus, tanba ho kazu ne’ebé mak aumenta, TL iha tendénsia atu ba duni faze ne’ebé mak boot.
Perante situasaun ne’e, MS deklara, desde kedan COVID-19 hahú iha TL hato’o bebeik ba komunidade katak, rekursu limitadu, no apela atu sidadaun hotu-hotu fó kontribuisaun ba nasaun ida-ne’e hodi kombate moras aat ne’e.
Oras ne’e daudaun MS buka hela fatin izolamentu atu tau ema-sira ne’ebé ho moras COVID-19, tanba oras ne’e daudaun númeru iha izolamentu no kuarentena sa’e ba 1000-resin.
“Ida-ne’e mak Governu nia esforsu, entaun Importante mak populasaun tenke fiar katak, COVID-19 ne’e eziste duni iha TL,” nia subliña.
Entretantu, ohin Sala Situasaun Sentru Integradu Jestaun Krize (SIJK) rejista kazu pozitivu COVID-19 hamutuk 52, rekoperadu 18, kazu ativu 1.050.
Jornalista: Felicidade Ximenes
Editór: Cipriano Colo
