DILI, 27 abríl 2021 (TATOLI)-–Sekretaria Estadu Terra no Propriedade (SETP) hahú identifika fatin atu harii bairru foun ba abitante afetadu inundasaun ne’ebé mak akontese iha domingu (04/04).
Vise Primeiru-Ministru (PM) no Ministru Planu no Ordenamentu, José Maria dos Reis, hateten, daudaun SETP identifika fatin provizóriu ba abitante afetadu sira área Tasi-tolu ne’ebé hetan impkatu maka’as hosi dezastre naturál.
“Ita tenke iha solusaun, liuliu identifikasaun fatin atu halo bairru foun ba komunidade afetadu sira tanba ita labele trava de’it ema hela iha área risku sira maibé ita la fó solusaun. Tanba ne’e, daudaun Sekretaria Estadu Terra no Proporiedade (SETP) hamutuk ho ekipa integradu halo hela serbisu,” Vise PM relata hafoin reuniaun Konsellu Administrasaun Fundu Infraestrutura (KAFI) iha salaun Ministériu Finansa, Aitarak-laran, segunda ne’e.
Nia konsidera presiza identifika lalais fatin provizóriu ba abitante afetadu sira tanba agora sira iha hela postu refujiadu no labele fila tanba kuaze hela fatin a’at hotu.
“Ita seidauk identifika fatin própriu ida, ne’ebé ita hein de’it Terra no Propriedade nia relatóriu identifikasaun,” Ministru akresenta.
Aleinde ne’e, Konsellu Ministru mós aprova deklarasaun situasaun kalamidade, ne’ebé iha artigu 4 proíbidu populasaun filafali ba sira-nia hela fatin ne’ebé konsidera hanesan zona risku.
Notísia relevante: Timor-Leste deklara Estadu situasaun kalamidade nível nasionál durante loron 30
Tanba ne’e, daudaun ekipa tékniku sira kompostu hosi Ministériu Planu no Ordenamentu (MPO), Sekretaria Estadu Ambiente (SEA), SETP, Insitutu Petróleu no Jeolojia (IPG, sigla portugés) no Ministériu Administrasaun Estatál (MAE) halo serbisu define fatin risku sira.
“Ita hatene katak iha mota ninin no foho lolon sira ne’ebé populasaun hela ne’e mak risku,” nia subliña.
Tuir governante ne’e, hafoin ekipa sira halo identifikasaun mak halo mapamentu hodi bandu populasaun sira labele hela ka halo uma ba fatin risku tanba fó ameansa ba vida.
“Ita-nia tékniku sira halo hela serbisu hafoin sei aprezenta relatóriu no halo mapamentu,” nia akresenta.
Jornalista: Florêncio Miranda Ximenes
Editora: Julia Chatarina
