DILI, 28 abríl 2021 (TATOLI)—VIII Governu Konstitusionál agradese apoiu Deputadu sira iha Parlamentu Nasionál (PN), tanba aprova ona pedidu estensaun Estadu Emerjénsia (EE) da-XIII hanesan dalan ba prevesaun no luta kombate COVID-19.
“Ha’u hanoin laiha objesaun ba estasaun ida-ne’e. Nune’e agradese tebes ba apoiu, opiniaun no solusaun ne’ebé mak iha atu reforsa Governu hasoru situasaun ida-ne’e,” Vise Primeiru-Ministru (PM) no Ministru no Ministru ba Planu no Ordenamentu, José Maria dos Reis, hateten iha debate estensaun iha sala plenária PN, kuarta ne’e.
Notísia relevante: PN autoriza PR Lú Olo dekreta estadu emerjénsia ba dala-XIII
Pedidu renova deklarasaun EE aprovadu ho rezultadu votasaun a-favór 43, abstesaun 16 no kontra 0.
Nune’e, PN autoriza Xefe Estadu dekreta EE ba loron 30 tan, hahú hosi tuku 00:00 iha loron 03 maiu no sei termina iha tuku 23:59, loron 01 juñu 2021.
Tuir Vise PM, rekomendasaun no opsaun hosi Sala Situasaun-Sentru Integradu Jestaun Krize (CIGC, sigla portugés) no Deputadu sira, sei lori ba Konsellu Ministru atu diskute no aprova medida ne’ebé di’ak no nesesáriu liu atu implementa.
Notísia relevante: CIGC rekomenda opsaun tolu ba Governu kombate transmisaun komunitária
Governu mós kontinua esforsu atu halo korresaun ba medida EE antes ne’e inklui Serka Sanitária hodi prevene kontájia COVID-19 maka’as liután.
“Ita hotu hatene katak inimigu ida-ne’e ita la hareee no nia mai la eskolla ema, tanba ne’e Governu fó atensaun tomak hodi foti medida hotu, maski Governu foti medida ba vijilánsia di’ak liu, maibé ita la konsege nafatin tanba iha fronteira ho nasaun viziñu Indonézia, família besik no dependésia ba nasaun viziñu” nia akresenta.
Aleinde ne’e, governante ne’e rekoñese, hafoin akontese dezatre naturál iha loron 04 abríl, halo situasaun pior liután tanba suspende konfinamentu domisiliáriu jerál hodi fó apoiu ba komunidade halo dezlokasaun no Governu fó apoia umanitária ba populasaun afetadu dezastre naturál.
Nune’e, Governu mós lori ona orsamentu retifikativu hodi haree ba COVID-19 no impkatu sosiu-ekonómiku, nune’e bele reforsa liután kbiit hodi atende kalamidade ne’e.
Notísia relevante: PN haruka ona proposta Orsamentu Retifikativu ba PR
Mensajen Prezidente Repúblika, Francisco Guterres ‘Lú Olo, atu propoin ba PN halo estensaun EE da-XIII ba loron 30 iha territóriu nasionál ho parsialmente, sei suspende sirkulasaun internasionál, liberdade sirkulasaun, direitu reuniaun no manifestasaun, liberdade kultura inklui limita no proibe selebrasaun relijioza.
Nune’e mós, direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.
Direitu rezisténsia sei impede hosi autoridade públika bainhira sidadaun sira la kumpre medida ezekusaun sira.
Jornalista: Florêncio Miranda Ximenes
Editora: Julia Chatarina
