DILI, 28 abríl 2021 (TATOLI)—Governu liu hosi Sekretária Estadu Protesaun Sivíl (SEPS), kontinua esforsu hodi fó apoiu no re-integra vítima dezastre naturál hamutuk 4.456 hosi Munisipiu Dili, ne’ebé to’o agora kontinua okupa sentru evakuasaun hitu.
“Governu kontinua halo esforsu hodi fó apoiu ba ita-nia maluk vítima-sira, hodi re-integra ba sira-nia fatin,” SEPS, Joaquim José Gusmão dos Reis hateten ba jornalista-sira iha serbisu fatin, Caicoli, kuarta ne’e.
Notísia relevante:Entidade 47 fó ona apoiu umanitáriu liu hosi SEPS
Nia atualiza dala ida-tan, katak, oras ne’e daudaun iha abitante 4.456 mai hosi família 854 mak sei kontinua hela provizóriu iha Sentru Evakuasaun hitu (7) hanesan, Dom Bosco Comoro, Kapela João Paulo II Tasi-tolu, Komunidade Madre Canosiana Balide, Eskola Públika 05 Comoro, no Seminário Sagrado Coraçăo de Jesus (SACROJES) Hera inklui Postu Evakuasaun Hera.
“Ita-nia maluk sira ne’e seidauk bele fila ba uma, tanba sira-nia fatin hetan estragu totál,” Joaquim José Gusmão dos Reis hateten.
Kona-bá vitima-sira ne’ebé uma hetan estragu totál, ekipa Diresaun Nasionál Prevensaun Konflitu Komunitáriu (DNPKK) no Diresaun Nasionál Risku Dezastre Naturál (DNRDN) serbisu hamutuk ho Plan Internationál, rekolla ona dadus hodi hein atu fó apoiu materiál konstrusaun.
SEPS rasik aprezenta ona iha proposta orsamentál atu halo rekoperasaun ba vítima-sira ne’ebé uma hetan etragu grave, sei hetan osan no apoiu materiál.
“Ita aprezenta kritéria tolu ne’ebé sei rekopera, primeiru, ita iha kritéria ba estragu totál ka grave ho pakote ne’ebé ita kalkula kuaze $850, kompostu hosi kustu ba materiál $477 no ba mão de obra $348,” nia esplika.
Alende ne’e, Governu mós prepara apoiu materiál konstrusaun ba uma ne’ebé hetan estragu, sei simu kalén 50, pregu sentímetru 12 kilograma rua, pregu sentímetru 10 kilograma rua, pregu sentimetru hitu kilograma haat, besi betón 10 mm hamutuk lolon 12, besi betón 8mm loloon 10, arrame kesi besi rolu ru, semente saka 25 no seluk tan.
Entretantu, Governu Timor-Leste liu hosi reuniaun Konsellu Ministru (KM) simu ona dadus prelimináriu ba dezastre naturál ne’ebé akontese iha 04 abríl hamate ema no lakon 41, família afetadu 21.676 no dezlokadu 7.246 iha lokalizasaun 31, ne’ebé ho kustu estimasaun kuaje millaun $50 ba sidadaun sira-nia sasan no uma.
Jornalista: Eugénio Pereira
Editór: Cipriano Colo
