DILI, 29 abríl 2021 (TATOLI)—Reuniaun Konsellu Ministru (KM) iha kinta ne’e, membru Governu sira asiste aprezentasaun hosi Sala Situasaun-Sentru Integradu Jestaun Krize (CIGC, sigla portugés) kona-ba pontu situasaun epidemiolójika país nian.
Ministru Prezidénsia Konsellu Ministru, Fidelis Manuel Leite Magalhães, haktuir, bazeia aprezentasaun ne’e, hahú inísiu deteta kazu konfirmadu COVID-19 dahuluk iha Timor-Leste to’o agora hamutuk rejista ona 2.124.
Notísia relevante: COVID-19: tuir klasifikasaun OMS, Dili hahú tama transmisaun komunitária
“Iha kazu detetadu sira iha munisípiu hotu, munisípiu Dili maka infetadu liu, ne’ebé rejista infetadu 1.794 hosi totál kazu rejistadu no konsidera eziste klasifikasaun transmisaun komunitária,” Ministru relata hafoin reuniaun KM iha Palásiu Governu, kinta ne’e.
Bainhira sura hosi marsu 2020 to’o agora, totál konfirmadu COVID-19 rejistadu iha Dili hamutuk 1.860 hosi totál rejistadu iha territóriu tomak.
Nune’e, daudaun iha kazu ativu hamutuk 1.014 no rejista ona kazu moderadu 21 no na’in-rua grave.
Aleinde ne’e, taxa insidénsia iha munisípiu Dili daudaun maka 27,3 hosi abitante 100.000.
Jornalista: Antónia Gusmão
Editora: Julia Chatarina
