DILI, 29 abríl 2021 (TATOLI)–Governu liuhosi Ministériu Obra Públika (MOP) klasifika ona projetu reabilitasaun impaktu dezastre naturál ne’ebé akontese iha domingu (04/04).
Dadus ne’e aprezenta hosi Ministru Obras públika, Salvador Eugênio Soares dos Reis Piresi, iha reuniaun Konsellu Ministru (KM).
“Ministru Obra Públika aprezenta dadus kona-ba identifikasaun ba infraestrutura no ekipamentu públiku koletivu, ne’ebé hetan estragu hosi inundasaun, tuir levantamentu dadus preleminár, klasifikasaun obra indika ba projetu reabilitasaun estruturál simples hamutuk 57 no projetu reabilitasaun estruturál komplexa hamutuk 44,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kinta ne’e.
Portavós Governu esplika, projetu reabilitasaun estruturál simples hosi kustu inferiór millaun $1 no projetu reabilitasaun estruturál komplexa ho kustu estimadu boot-liu millaun $1.
Jornalista: Antónia Gusmão
Editora: Julia Chatarina
