DILI 29 abríl 2021 (TATOLI)—Govenu Xina entrega simbolikamente armazen Baucau no Natarbora ba Governu Timor-Leste liuhosi Sentru Lojístika Nasionál (CLN, sigla portugés), ne’ebé projetu kontrusaun ne’e realiza hosi kompañia Sanghai Construction.
Iha seremónia entrega simbolikamente, Reprezentante hosi Embaixada Xina iha Timor-Leste, Geng Xiewei no Prezidente CLN, Augusto Junior Trindade, asina termu referénsia, ne’ebé akompaña hosi Ministru Koordenadór Asuntu Ekonómiku, Joaquim Amaral, Ministru Agrikultura no Peska, Pedro Reis, Vise Ministru Turizmu, Komérsiu no Indústria, Domingos Lopes Antunes, inklui ekipa hosi Embaixada Xina.
“Ohin seremónia entrega simbolikamente armazen rua ne’ebé Governu Xina oferese ba ita. Loloos seremónia halo iha lokál konstrusaun, maibé ho situasaun serka sanitária maka entrega de’it iha Dili,” Ministru Koordenadór Asuntu Ekonómiku, Joaquim Amaral, hateten hafoin partisipa seremónia, iha salaun TrandeInvest, kinta ne’e.
Konstrusaun armazen rua hahú iha jullu 2019 no ramata iha marsu 2021, ho finansiamentu hosi Governu Xina ho montante millaun $2,4.
Goverante ne’e esplika, kapasidade armazen ida bele rai produtu tonelada 5.000, kompleta ho mákina modernu ba prosesamentu hare no loron ida bele akumula tonelada 20.
“Armazen rua bele kobre produtu hosi parte Leste hanesan Baucau, Lospalos no Viqueque inklui mós parte rai klaran munisípiu Ainaro,” nia akresenta.
Biban ne’e, Ministru Joaqim Amaral, agradese ba Governu Xina tanba ajuda ona Timor-Leste iha parte seguransa ba ai-han.
“Agradese tebes ba Governu Xina no ba oin Governu Timor-Leste nia obrigasaun maka dada bee no instala eletrisidade,” nia hatutan.
Parte CLN maka sei responsável direta ba armazen Baucau no Natarbora no timor-oan maka sei halo operasaun no jestaun tanba hetan ona formasaun hosi parte Xina.
Iha fatin hanesan, Reprezentante Embaixadór Xina iha Timor-Leste, Geng Xiewei, hateten armajen rua ne’e bele akumula ona produtu ne’ebé Timor-Leste iha.
“Relasaun Governu Xina no Timor-Leste sei kontinua nafatin hanesan agora, no Governu Xina kontinua apoiu Timor-Leste iha kualker área,” nia dehan.
Jornalista: Natalino Costa
Editora: Julia Chatarina
